Savalimmiuni inatsisartuni ilaasortat arnartaat marloriaammik amerlipput

Savalimmiuni inatsisartunut ippassaq qinersinermi naalakkersuisoqatigiit ilaasortaatitaat ataatsimik ikileriaraluarput, taamaakkaluartoq naalakkersuisoqatigiit partiinit pingasunit katitigaasoq ingerlariaqqinnissaminnut misiliiniarput
Allattoq Jaaku Lyberth
januaarip 20-at 2008 14:17

Socialdemokratit Sambandspartiiet Folkeflokkenilu inatsisartuni 20-inik ilaasortaatitaqalerput. Savalimmiuni inatsisartunut ilaasortat 33-iupput.

Naalakkersuisuit siulittaasuata Joannes Eidesgaardip partiia Socialdemokratit ilaasortaatitaat ataatsimik ikiliariarput, taamaattorlu partiit naalakkersuisoqataasut allat marluk oqaloqatigineqarnissaat Joannes Eidesgaardip pisariaqartillugu oqaatigaa

Høgni Høydalip partiia Republikanerit procentitigut siuariaraluarni inatsisartuni ilaasortaatitaat arfineq pingasuullutik alannguuteqanngillat, naalakkersuisooqataanissaminnillu suliniuteqarniarlutik ilungersorniarput.

Savalimmiuni inatsisartunut qinersinerup kingorna ilaasortat allannguuteqangaatsiarput, arnat ilaasortaatitat marloriaammik amerleriarput, pingasuusimagaluarlutik arfineq marluk inatsisartuni ilaasortanngorput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq