Savalimmiuni immikkoortitsisarneq ingalassimaqquneqarpoq

Savalimmiuni anguteqatiminnik atoqateqartartut pisinnaatitaaffii pillugit, socialdemokratit Nunani Avannarlerni Siunnersuisoqatigiinni sinniisuutitaat Savalimmiuni ministerinut saaffiginninniarlutik pilersaarutigaat.
oktobarip 31-at 2006 15:21

Tamatumunnga tunuliaqutaavoq, angutip anguteqatiminik atoqateqartartup, 25-nik ukiullip, Thorshavnimi qaammat kingulleq saassunneqarluni persuttarneqarsimanera.

- Anguteqatiminoortuunini isertuunnagu ammaffigimmagu timikkut tarnikkullu annersinneqarnissaa pisariaqanngilaq, tamanna inuit pisinnaatitaaffiinik unioqqutitsineruvoq annertooq, socialdemokratit gruppianni islandimiut ilaasortaatitaat, Rannveig Gudmundsdottir, oqarpoq.

- Pisoq Savalimmiunuinnaq tunnganngilaq. Inuit pisinnaatitaaffiinut tunngasut nunarsuarmiunit tamanit illersorneqartussaapput. Inuillu pisinnaatitaaffii Savalimmiuni aamma soorunami atuutissapput, Rannveig Gudmundsdottir tikkuaavoq.

Anguteqatiminnik atoqateqartartunik Savalimmiuni immikkoortitsisarneq Nunani Avannarlerni naalakkersuisunit iliuuseqarfigineqaqqullugu socialdemokratit Siunnersuisoqatigiinni ilaasortaatitaasa tamarmiusut kajumissaarutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq