Savalimmiuni illusineq akisoqaaq

Savalimmiuni illut akii ukioq kingulleq qaffariarujussuarsimapput.

Illoqarfiit pingaarnersaanni, Torshavnimi, tamanna ingasannersaasoq, aningaaseriviup Føroya Bankip naatsorsuutaani takuneqarsinnaavoq, illusiniaraannigooq 2005-imut naleqqiullugu 1 millioni koruuninik siorna akisunerulersimalluni.

Soorlu Torshavnimi ukioq kingulleq immaqa villasisoqarpoq 1,5 millioni koruunilimmik, maanna taamaattumik illusiniaraanni asserpianngua 2,5 millioni koruuneqarpoq.

Illoqarfinni annerumaani allani, soorlu Tværåmi Runavikimilu aamma illoqarfiit annersaata tulliani Klaksvigimi illut 400.000 koruuninik qaffassimapput, 1,2 millioni koruuneqalerlutik.

Illutaarniarluni akiligassarsiniartunut piumasaqaatit Savalimmiuni aningaaseriviit ukiup ataatsip matuma siorna nutartersimavaat, illullu akitsoriarujussuarnerannut ilaatigut tamanna peqqutaagunarpoq.

Siornatigut illusiniaraanni aningaaserivinni aningaasanik aalajangersimasumik ernialerlugit taarsigassarsinikkut pisinnaasimavoq, atukkallu ukiuni 20-ni akilersorneqarsinnaallutik, maannali assigiinnginnerusumik taarsigassarsisoqarsinnaalersimavoq, soorlu ukiuni amerlanerusuni taarsersuisoqarsinnaalluni.