Savalimmiuni ilagiit imminnut akisussaaffigilissapput

Savalimmiuni ilageeqarneq, Danmarkimut maanna atagaluartoq, Savalimmiunut maanna atalissaaq.

Ilageeqarnermut Ilinniartitaanermullu Danmarkimi naalakkersuisoq, Bertel Haarder, Savalimmiunut qanittukkut angalaniarpoq, ilagiit savalimmiormiut namminneq nunaminnit tapersersorneqalernissaasa aalajangersarneqarnerat Savalimmiuni Ilageeqarnermut Ilinniartitaanermullu naalakkersuisoq peqatigalugu atsioriartorlugu.

Pilersaarutaavoq ilageeqarnermut inatsisit lagtingip maanna atuuttup ingerlanerani saqqummiunneqassasut, taamaalilluni savalimmiormiut inuiattut aappaagu juulip ulluisa 29-ianni ullorsiulerpata ilageeqarneq namminneq oqartussaaffigilissagaluarmassuk. Savalimmiormiut inuiattut ullorsiornerat Olajisiornermik taaneqartarpoq.

Savalimmiuni oqaluffiit katillugit 60-iupput, palasit 22-llutik. Savalimmiuni ilageeqarnermut 13 millioni koruuninik danskit naalagaaffiat ukiumut aningaasaliisarpoq.

Ilageeqarneq Savalimmiut namminneq akisussaaffigilerunikku aamma namminneq oqaluffimminnut akiliuteqartalernissaat naatsorsuutigineqarpoq.

Savalimmiuni ilageeqarneq qanga ullumikkullu savalimmiormiunut pingaaruteqaqaaq. Nunaqarfinni illoqarfinnilu innuttaasut amerlanersaat sapaatikkut naalagiartarput.