Savalimmiuni homonut politikki akerlileraat
Savalimmiuni politikerit qaammatip tulliani kinguaassiutitigut anguteqatiminoortarneq arnaqatiminoortarnerlu inatsisitigut inerteqqutaatinneqassanersoq pillarneqaataasassanersorluunniit aalajangiivigissavaat.
Tamannalu tunngavigalugu danskit universitetimi ilinniartut atsiortitsillutik akerliunerminnik malunnartitsinialerput.
Siusinnerusukkut Savalimmiuni ajornartorsiut tamannarpiaq politikkikkut assortuussutaasareerpoq, Savalimmiunilu inatsisartuni ilaasortat arlallit isumaqartarput angut anguteqamminik tutitaqartartoq qilaliarsinnaanavianngitsoq.
Danmarkimilu universitetimi ilinniartut ullup unnuallu ingerlanerinnaani atsiornerit 150-t atsiortereersimavaat.
- Atsiortitsinitsinnut siunertaraarput, avammut takutikkusukkatsigu, anguteqatiminoortartut arnaqatiminoortartullu upperisarluunniit tunngavigineqaraluarpat nikassarneqarnerat akuerineqarsinnaanngilluinnartoq, taama oqarpoq atsiortitsinermut aallarniisoq Nynne Nørup.
Atsiortitseqatigiit Savalimmiuni homonut inatsit piaaralutik taaguuteqartippaat ”homunut sapigallit inatsisaat”, taakkulu erseqqissaatigaat Inuit pisinnaatitaaffii pillugit kommissionip inatsisaanut tamanna unioqqutitsinerusoq.
Atsiortitsinerillugooq savalimmiuni inatsisartunut nassiunneqasssapput.
