Savalimmiuni innuttaasut 50.000-it missaanniipput. Coronavirusimillu tunillanneqarsimasumik napparsimasumik siumuisoqaqqinngilaq. Asseq: ToqqorsivimmitAssi: Anton Gundersen Lihn, KNR

Savalimmiuni coronavirusimik tunillatsissimasut 187-it peqqissisut

Savalimmiuni coronavirusimik tunillatsissimasutut paasineqartut ikiliartuinnavissimapput, napparsimasullu tamarmik peqqissisimasut nalunaarutigineqarpoq.

Savalimmiuni coronavirusimik tunillatsissimasoq siulleq qaammatit marluk matuma siornatigut nassaarineqarpoq tamarmillu peqqissisimasut maanna nalunaarutigineqarpoq.

Savalimmiuni coronavirus pillugu naalakkersuisut nittartagaanni tamanna atuarneqarsinnaavoq.

Coronavirusimik tunillanneqarsimasoq siulleq marsip ulluisa sisamaanni siumorneqarmalli coronavirusip tuniluutilertunnginnissaa pillugu killilersuinerit sukannersut atuutilersinneqarput, sapinngisamillu amerlasuut misissortinnissaat suliniutigineqarluni.

Savalimmiuni innuttaasut 50.000-it missaanniipput, Danmarkimullu naleqqiukkaanni inuit amerlanerusut coronavirusimut misissortissimallutik.

AAMMA ATUARUK Savalimmiut: Coronamik tunillatsinnikuusimasut napparsimaleqqittut

Tunillatsissimasoq tunillatsissimasumillu attuumassuteqarsimasut angerlarsimaannaqquneqarnissaat piumasaqaataasimavoq.

Coronavirusimik tunillatsissimasut, napparsimanermillu takussutissaqartut ikinnerpaamik ulluni 14-ini mattuteqanissaat piumasaqaataavoq.

Napparsimanermik akunnerni 48-ni takussutissaqarsimanngikkaanni Danmarkimi suliartortoqaqqissinnaavoq atuariartoqqissinnaalerluniluunniit.

Inuit 187-it coronavirusimik Savalimmiuni tunillatsissimasutut nalunaarsorneqarput, inuillu katillugit 8403-t misissorneqarsimallutik.

Napparsimasut arlaannaalluunniit napparsimmavimmi uninnganikuunngilaq, nappaat toqqutigineqarnikuunngilaq, tamarmillu aamma peqqissisimasut nalunaarutigineqarpoq.

Isummersuutit