Savalimmiut Kalaallit Nunaat assigalugu nunanut covid-19-imik tuniluuffiunngitsut ilamininnguinut ilaavoq.Assi: Begemot/Flickr Commons

Savalimmiuni coronavirusimik tunillanneqarsimasueruteqqittoq

Savalimmiuni coronavirusimik tunillanneqarsimasutut nalunaarsukkat maannamut katillutik 658-iusuni 657-it peqqisseqqittutut nalunaarutigineqareerput. Ataaserlu nappaammik taassuminnga toqquteqarsimavoq.

Savalimmiuni Kalaallit Nunaat assigalugu coronavirusimik tunillanneqarsimasueruteqqippoq. 

Savalimmiuni coronavirusimik tunillanneqarsimasueruttoq kingullermik nalunaarutigineqarmat, juulip ulluisa pingajuanni pivoq.

Savalimmiuni oqartussat tallimanngormat unnukkut taama nalunaarput. 

- Tusarluarnaqaaq. Savalimmiuni eqqortumik iliuuserisarpassuaqarpugut. Aallaqqaataanilli misissuinermut, tunillanneqarsimasut inuit attavigisimasaannik ujarlernermut immikkoorsimaarnissamullu pilersaarutitsinnik attassinissamik aalajangernerput isumatusaarluarnerusimaqaaq, savalimmiormiut naalakkersuisuisa siulittaasuat Bárður á Steig Nielsen tusagassiuutinut tallimanngormat nalunaarpoq.

Tassa imaappoq, Savalimmiut Kalaallit Nunaat assigalugu nunanut covid-19-imik tuniluuffiunngitsut ilamininnguinut ilaavoq.

Juullikkunni tuniluutipiloortoq

Coronavirusi Savalimmiuni ataasiaannarani tuniluutipiloorlunilu tuniluuppiarunnaarsimasoq, Savalimmiuni nutaarsiassaqartitsiviit ilaat allappoq. Coronavirusi Savalimmiuni 2020-mi marsip qiteqqunnerani tuniluutipiloorpoq. Maajimi coronavirusimik tunillanneqarsimasueruppoq, kisianni juulimi aggustimilu tuniluuteqqilerluni.

Ukiaq tuniluuppianngilaq, juullikkunnilu tuniluutipilooqqilluni.

Savalimmiuni coronavirusimik tunillanneqarsimasueruteqqikkaluartoq savalimmiormiut suli mianersussasut, nakorsaanerat erseqqissaavoq.

AAMMA ATUARUK Danskit inuusuttut tallimat Savalimmiunukariarlutik toqqaannartumik illoqarfiliartut

– Avataaniit nunatsinnut tikittunit tuniluutileqqittarpoq, ingammillu coronavirusit ilaat tunillaassuutianerusut perulutsitsianerusullu Europami tuniluutileruttortuusut nunatsinni tuniluutilernissaat ernummatigaarput, Savalimmiuni nakorsaaneq Lars Fodgaard Møller Kringvarp Føroyamut oqarpoq.

– Katersuuffiusuniinnaveersaartuarsinnarlutalu eqqiluisaarluartuarsinnaassaagut. Nunatsinni killeqarfiit ammaqqikkaluarutsigit maannamut angusavut maanngaannarterataannaavagut. Tuniluutianerusoq tuniluutileraluarpat suut tamarmik ajalusooriaannaapput, Lars Fodgaard Møller erseqqissaavoq.

Savalimmiuni inuit 8 procentii coronamut akiuussuserneqareertut

Savalimmiunut tikittut coronamut misissortinnerminnit akissutissarsinissamik tungaanut angerlarsimaannarnissaat akunnittarfimminniiginnarnissaalluunniit piumasaqaataavoq.

Tikinnermiit ullut arfinilissaanni misissorteqqereernermi immikkoorsimaarnissaq aamma inassutaavoq. Coronavirusumik tunilanneqarsimanngitsut inassutit naapertorlugit immikkoorsimaartariaqanngillat.

Savalimmiuni coronavirusimik tunillanneqarsimasutut nalunaarsukkat maannamut katillutik 658-iupput. Taakkunannga ataatsip nappaat taanna toqqutigaa.

Savalimmiuni inuit 8 procentii coronamut ataasiarlutik akiuussuserneqarsimapput, 5 procentiilu marloriarlutik akiuussuserneqarsimallutik.

Nunatsinni inuit 16-ileereersut 8,9 procentii coronamut ataasiarlutik akiuussuserneqareerput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat