Savalimmiuni ataasiinaanngitsumik ernummateqarput
Inunnik assigiinngisitsisarneq pillugu inatsisissaq nutaaq, anguteqatiminnik arnaqatiminnillu atoqateqartartunik assigiinngisitsinermut tunngatillugu malittarisassanik sukateriffiusussaq, Savalimmiuni inatsisartut sapaatip akunnerata tulliani taasissutigilerpassuk – naalakkersuinikkut soqutigisat pineqaannaratik, anguteqatiminnik arnaqatiminnillu atoqateqartartut pisinnaatitaaffiinik ernummateqarneq aamma pineqassaaq.
Taama isumaqarpoq savalimmiormiu, danskit aviisianni ullormut saqqummersartumi, BT-mi, aviisiliortoq, Frodi Holm Knudsen.
Pineqartumi aningaasarsiornerup siunissaanik ernummateqarneq aamma ima oqaatigaa:
- Isumaqarpunga anguteqateqatiminnik arnaqatiminnillu atoqateqartartut naqisimaneqartut kisimik pineqanngitsut. Savalimmiuni inuiaqatigiit aamma pineqarput. Tassami taamatut naqisimanninnikkut, inunnillu taamaattunik tikilluaqqusinnginnikkut, sulisussat, nutaamillu eqqarsarnerit, pinngitsoorneqartarput. Tassami anguteqatiminnik arnaqatiminnillu atoqateqartartut amerlanersaat Københavnimut imaluunniit Londonimut, Stockholmimut Reykjavikimulluunniit nuuttarmata.
- Savalimmiuni muuamaat ilaarlugu titartakkatulli ajornartorsiornermik pisoqaraluttualinngila, tassami nunarsuarmi tamarmi atsiornernik katersisoqalereermat?
- Ajornartorsiummit tassannga ajornerusumik pisoqarsinnaavoq, tassami atsiortitsineq aallaqqaataannaavoq, tulliuttorlu tassaasinnaalluni savalimmiormiut tunisassiaannik mattussineq, siullermik Danmarkimi, kingornatigullu Nunani Avannarlerni. Nunallu taakku savalimmiormiut avammut niuerneranni pingaarnersaapput. Frodi Holm Knudsen oqarpoq.
Inunnik assigiinngisitsinermut inatsisissatut siunnersuut Savalimmiuni naalakkersuisut siulittaasuata Joannes Eidesgaardip siunnersuutigaa. Tassungalu atatillugu oqaatigaa Savalimmiuni anguteqatiminnik arnaqatiminnillu atoqateqartartut immikkoortinneqarnerat kanngusuutigigini.
