Kulturi

Savalimmiuni arsaannermi angusat pillugit nuannannersuaq

Frankrigimi EM-ertoqarnissaanut anngunniulluni unammisaqattaarnerni Savalimmiormiut Grækerit aappassaannik ajugaaffigaat. Islandip aappaagu unammersuarnissanut peqataasinnaanissani qulakkiingajalluinnarpaa. Danmark ippassaq aamma ajugaavoq.
Allattoq Peter Bye Andersen, Elisa Isaksen
juunip 14-at 2015 15:49

Arsaannermi Europami pissartanngorniunnissamut anngunniunnermut atatillugu Savalimmiormiut angutit nunanut allanut unammisartuisa Grækenland aappassaannik ippassaq unnukkut ajugaaffigimmassuk, Savalimmiuni nuannannersuaqarpoq.

Savalimmiormiut Grækenland 2-1-imik ajugaaffigaat. Grækerit Brasiliami aasaq kingulleq VM-ertoqarnerani ottendedelsfinalimut annguttunut ilaapput. Savalimmiormiut arfinileriarlutik unammereernerminni puljeminni normu 4-tut inissisimapput, tassa Finlandimit Grækenlandimillu siuarsimanerullutik.

Island aamma Danmark anngunniullutik unamminerminni aamma ajugaapput.

Islandip tupaallatsitsisaqattaarnini ingerlatiinnarlugu Tjekkiet 2-1-imik ajugaaffigaa. Island pulje A-mi arfinileriarluni unammereerluni 15 pointeqarluni siuttunngorpoq. Taamaalilluni Frankrigimi Europamiut aappaagu pissartanngorniunnissaanut Island siullerpaamik annguttussanngorunarpoq.

Danmark Serbiamut 2-0-imik ajugaanermi kingorna unammersuarnissanut anngunnissaminut qanilliallappoq. Danmark puljemini tallimariarluni unammereerluni maanna qulinik pointeqarpoq - taamaallaat Portugalimit aqqaneq marlunnik pointeqartumit qaangersimaneqarluni. 

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk