Savalimmiuni arnaanaasartut angutaannaasartullu mitallerneqannginnissaat inatsisiliuunneqangajalerpoq
Savalimmiuni pingasunngorpat paasinarsissaaq anguteqatiminnik arnaqatiminnillu atoqateqartartut Europap avannaamiuisulli mitallerneqannginnissamut inatsisitigut illersugaalissanersut.
Pingasunngorpat inunnik allanik immikkoortitsinnginnissamik inatsisip ilassutissaatut siunnersuut oqaluuserineqalerpat, Savalimmiut Inatsisartuini inatsimmik allanngortitsinissamut amerlanerussuteqartoqarunanngilaq.
Savalimmiormiut inatsisinut atortitsinermut ataatsimiititaliaani eqimattanut pingasunut avittoqarsimavoq, tassa ilaat akerliullutik taasiniartut – ilaat akuersillutik taasiniartut – ilaasortarlu ataaseq nalunaarpoq pingasunngorpat taasisoqalerpat aatsaat isummerniarluni.
Savalimmiuni naalakkersuinermik suliaqartut avataaniit qisuariaaterpassuarnik tigusaqarsimapput, anguteqatiminnik arnaqatiminnillu atoqateqartartut inatsisitigut illersorniarneqarnerannut tapersersuinnginnermut uparuartuisunik.
Ilaatigut Amnesty International aamma ministeriuneq Anders Fogh Rasmussen Savalimmiormiunut kajumissaaruteqarput, Savalimmiuni inuit pisinnaatitaaffii malinneqaqqullugit.
Aammattaaq Danmarkimi ilinniagaqartut akornanni atsiornernik katersuisoqarsimavoq soorluttaaq nunani allani nutaarsiassaqartitsiviit oqallinneq upperisarsiornermut sanguteqqajaaneqartartoq malinnaaffigeqqissaaraat.
