Savalimmiuni anorersuaq ajornartorsiortitsivoq
Anorersuarnerata kinguneranik Savalimmiut ullaap tungaani innaallagiaqanngilaq. Anorersuaq – sakkortoorujussuarnik anoraasuartalik – ima sakkortutigaaq, nunaqarfimmi Gøtumi lastbilit kalitaat assakaasimalluni aamma containerit bilillu aqqusinermiit tingitaallutik. Aamma illut angallatillu umiarsualivimmiittut ajoquserneqarsimapput.
Aamma qeqertat akornanni angallanneq nunanullu allanut angallatit uninngapput. Torshavnip Suderøllu akornanni ikaartaat avalassinnaanngilaq, anorlerpallaarneralu pissutigalugu bussit tamarmik uninngatinneqarlutik.
Anorersuaq Savalimmiunut piffissamik eqquinerloqisoq Ritzauimit aamma oqaatigineqarpoq. Tassami ullumikkut sapaat Savalimmiunut timmisartuussinikkut ulapaarfiunerpaasaraluarpoq, tassami Savalimmiormiorpassuit nunani allani najugaqartut ulluni makkunani juullisioriartorlutik angerlakaasarmata.
