Savalimmiuni aningaaserivik uukapaatitsimasutut unnerluutigineqarpoq

Islandimi aningaasaqarnermi nakkutilliisoqarfimmut aningaasap nalinganik uukapaatitsiniarsimasutut Savalimmiuni aningaaserivik, Eik Banki, Islandimi politiinut unnerluutigineqarpoq. Marloriarluni uukapaatitsisimasorineqarpoq, tassa pappialanik piginneqataassutinik tunisinermi akisunaarlugu tunisisimasutut aamma pappialanik piginneqataassutinik nammineq pisinermini akiliinikippallaarsimasutut. Aviisimi Jylland-Postenimi tamanna allaaserineqarpoq.
juulip 16-at 2009 07:50

Savalimmiunili aningaaserivik unioqqutitsisimannginnerarpoq. Taamaattoqarsimappalli aningaasaqarnermut nakkutilliisut taama sakkortutigisumik qisuariarnerat aningaaseriviup eqqumiigaa, aningaaseriviummi piginneqatigiissutinik marlunnik taakkuninnga niuernermini tusind koruunialunnguarnik taamaallaat iluanaarutigimmagit.

Niuerneq tunisinerlu Islandimi børsimi siorna juunimi juulimilu pivoq, Eik Bankimi sulisoq piginneqatigiissutinik siullermik tunisaqarmat, nakkutilliisullu isumaqarput tassani nalikinaarisoqarsimasoq, tunisisoq taamaalilluni 3.211 koruuninik amigartunik tunineqarsimalluni.

Aningaaseriviup kiffartuutaasa ilaat Atlantic Airwaysimi piginneqatigiissutinik 135-nik Eik Banki aqqutigalugu kingusinnerusukkut pisivoq, nakkutilliisullu isumaqarput taanna 396 koruuninik annaarunneqarsimasoq.

Aningaaserivimmit ilisimatitsissutigineqarpoq, pisoq Islandimi eqqartuussissuserisumut misissortissimagitsik, aningaaserivillu pineqartoq pinngitsuutinneqareersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq