Savalimmiuni ammip qalipaataa tunngavigalugu immikkoortitsineq

Nukappiaq simertoq Savalimmiuni Thorshavnimi saassunneqarmat, pisoq ammip qalipaataa tunngavigalugu nikassaanertut nalilerneqarpoq, politikkikkullu akisussaasuusut akuliupput.

Savalimmiuni naalakkersuisunut siulittaasoq Jóannes Eidesgaard pisoq tunngavigalugu ataatsimiisitsimmat, aalajangiunneqarpoq ammip qalipaataa tunngavigalugu nikassaasarneq akiorniarneqalissasoq.

Nukappiaq saassunneqartoq 16-inik ukioqarpoq, Savalimmiormiunillu qitornarsiaalluni.

Thorshavnimi sapaatip-akunnerata siuliata naanerani unnuakkut pisutsilluni angutinit arlalinnit 20-t sinnerlugit ukioqassangatinneqartunit nilliaffigineqarpoq.

Taamaalimmat nukappiaq imminut illersorniarluni Savalimmiuni najugaqarsinnaatitaanini oqaatigisimavaa, akilluguli isimminneqaannarsimalluni, arlallillu tigummiaraat ataatsip kiinaagut kilersimavaa.

Saassussisut politiinit suli nassaarinngilaat.

- Taamatut saassussineq ammip qalipaataa tunngavigalugu nikassaaneruvoq, assullu kanngunarluni, naalakkersuisut siulittaasuat Jóannes Eidesgaard ataatsimiisitsereernermi kingorna oqarpoq.

Nunap iluani pissutsinut naalakkersuisup politiit peqatigalugit ammip qalipaataa tunngavigalugu nikassaasarneq akiornialerpaat.