Savalimmiuni AIDS atugaanngilaq
Savalimmiormiut taamaalillutik AIDS-eqartuni ikinnerpaanertik pillugu nunani avannarlerni rekordiliipput.
1989-imili Savalimmiuni inuit arfineq-marluinnaat HIV-eqartut AIDS-imik nappaateqalersimasutut nalunaarsorneqarsimapput, ukiunilu aqqaneq-marlunni kingullerni AIDS-ertoqalersimaneranik nalunaarsuisoqarsimanngilaq.
Kalaallit Nunatsinni Danmarkimilu kisitsisit qaffasinneroqaat. Nunani Avannarlerni Peqqinneq pillugu ukiumoortumik nalunaarusiami allaaserineqarpoq, Kalaallit Nunaanni 2005-imi pingasut AIDS-imik toqquteqarsimasut, Danmarkimilu ukioq taanna aamma 39-t AIDS-erlutik toqusimasut.
Savalimmiuni ukiut tamakkiallugit HIV-mik AIDS-imillu nappaateqarfiunnginnera, nakorsaanerup Høgni Debes Joensen-ip arlalinnik pissuteqarnerarpaa.
- Imaassinnaavoq savalimmiormiut assuarnaatsumik ileqqorinnerullutillu inuuneqartut, kisianni aamma imaassinnaavoq kinguneqarluartumik paasisitsiniaasarnerit pissutaasut. Kingullerlu uanga nammineq ilimagineruara, Joensen oqarpoq.
- Assuarnaatsumik ileqqorinnerullunilu inuuneqarneq ilimagivallaanngilara, tassami kinguaassiuutitigut nappaat clamydia savalimmiormiut akornanni atugaasorujussuuvoq, taamaammat 1980-ikkut qiteqqutereersullu paasisitsiniaalluartalerneq AIDS-ip Savalimmiuni atugaannginneranut pissutaasoq, Høgni Debes Joensen Ritzau-imut oqarpoq.