Savalimmiuni aalisarunnaarallaqqusipput
Saarulliit aalisakkallu allat ikiliartortut illersorniarlugit Savalimmiuni naalakkersuisut ullut aalisarfiusussat ikinnerulersinniarpaat. Ullut aalisarfiusussat pillugit siunnersuummi aalisarnermut naalakkersuisup Bjørn Kallsøp Savalimmiuni inatsisartunut saqqummiussaani ilaatigut qaammat ataaseq angullugu Savalimmiut imartaani aalisartoqannginnissaa inassutiginiarneqarpoq.
Ullunik aalisarfiusussanik killiliiniarnerup imarai, soorlu Savalimmiormiut juulli ullunik 14-inik sioqqullugu Savalimmiut imartaani aalisaqqusaajunnaassasut, soorluttaaq Savalimmiormiut inuiattut ullorsiortarfiat juulip 29-at sapaatip-akunneranik sioqqullugu aamma ullup taassuma kingornatigut sapaatip-akunnera ataaseq aalisartoqassanngitsoq.
Aalisarnermut naalakkersuisup taamaalilluni nunat tamat akornanni imartanik misissuisartut – ICES-ip – aamma Savalimmiuni aalisarnermut misissuisoqarfiup mianersoqqussutai malinnialerpai.
Taakkua uparuarpaat Savalimmiut imartaani saarulliit ima ikileriarsimatigisut, allaat ukiuni tulliuttuni saarullinniartoqartariaqarani. Tamatuma saniatigut misaqqarnanut saarulliillu ilaannut storsej-inik taaneqartartunut pisassiissutit amerlineqassanngitsut.
Taamatut ullunik aalisarfiusussanik ikilisaarujussuarniarneq Savalimmiormiunit aalisarnermik ingerlatsisunit naammagittaalliutigineqarnissaa naatsorsuutigineqartoq, Ritzauimit oqaatigineqarpoq.
