Savalimmiormiut sullorsualiulersaartut
Savalimmiormiut immap naqqatigut sullorsuarmik biilit aqqutissaannik nunarsuarmi takinerpaamik sananialersaarput.
Qeqertat annersaanni Strømømiit kujasinnerulaartumut Sandømut 200 meteritut ititigisumi 11,9 kilometeritut takitigisumik sullorsualiulerput. Suliariniagaat 690 millioni koruuninik akeqassaaq. Atuagassiami Ingeniørenimi taama allaaserinnittoqarpoq.
Savalimmiuni sullorsuaq nutaaq atulerpat savalimmiormiut 88 procentii ikaartaaseratik attaveqaqatigiissinnaalissapput, 85 procentii biilerlutik imminnut ullumi ornissinnaapput.
Naatsorsuutigineqarpoq sullorsuaq naammassippat biilit ullormut 400-t missaanniittut sullorsuakkoortassasut.
Tusagassiuutini oqallisigineqarpoq sullorsualiassaq 11,9 kilometeritut takitigisoq aallarniutaaginnarnersoq, Sandømiit suli kujammut Süderoy-imut 25 kilometeritut takitigisumik sullorsualiussamaartoqarsorineqarmat.
Taamatut sullorsualiortoqaraluarpat savalimmiormiut 99 procentii aqqusinikkoorlutik imminnut attaveqaqatigiissinnaalissagaluarput.
Manna tikillugu nunarsuarmi immap naqqatigut aqqusinniat takinersaat Japanimiippoq 9,6 kilometeriulluni, nunani avannarlerni takinersaat Norgimiippoq 8 kilometeriulluni.
