Savalimmiormiut suliffeqarfiisa Nunarput soqutiginerusariaqaraluarpaat

Savalimmiormiut Kalaallit Nunaanni aningaasaliisarneri maannamut annikitsuinnaapput, Edmund Joensenili, maannamut qinigaaffinni marlunni Folketingimut ilaasortaasimasoq naapertussagaanni tamanna sukkasuumik allanngortittariaqarpoq.

- Kalaallit Nunaata qanittumik ileqquusumillu aalisarnikkut suleqatiginera ajoraluartumik annikillingaatsiarsimavoq, savalimmiormiullu suliffeqarfii ataasiakkaaginnaat ullumikkut Kalaallit Nunaanniipput. Savalimmiormiut sanaartornerup iluani suliffeqarfii immaqa nunami namminermi sanaartugassat kisiisa ukkatarivallaarsimavaat Savalimmiullu avataani niuerfiit soqutigivallaarnagit. Suliffeqarfiilli ataasiakkaat Savalimmiut avataanni suliariumannittussarsiuussinerni ajugaasimapput, unammilleqatigiinnerli sakkortuupilussuuvoq aporfissallu amerlasuut aqqusaaqqaarneqartariaqarlutik. Taamatut inissisimaneq allanngortittariaqarpoq, maannalu Kalaallit Nunaannut tunngatillugu periarfissaq ammarpoq, naak Kalaallit Nunaat ungasissupilussuarmiikkaluartoq. Suliniutit angisuut pillugit inatsit aqqutigalugu Kalaallit Nunaanni namminersorlutik oqartussat piginnaatitaaffiini nutaat siullerpaamik atorpaat, tamannalu nunani assigiinngitsuni maluginiarneqarsimavoq. Aamma Savalimmiuni, Edmund Joensen atuagassiamut Ræsonimut oqarpoq.

Savalimmiormiut tungaannit kinamiut sulisut akikitsut eqqarsaatigalugit unammillersinnaannginnerat Joensenip ilisimaarilluarpaa, Savalimmiormilli susassaqarfimmi tassani suliniuteqassanngillat. Susassaqarfiilli piginnaasat pillugit ilisimasanik pisariaqartitsiffiusut ukkatarineqassapput.

-Savalimmiuni sulisinnaasut nalinginnaasumik ilinniarluarsimasuupput annertuumillu nuttarsinnaassuseqarlutik. Tamanna pissutigalugu pilerinartuupput aammalu naleqqussarsinnaassuseqartuullutik. Piginnaasaqarfiit ilaatigut tassaapput aqquserniornerit, sullorsualiornerit, umiarsualiviliornerit illunillu sunilluunniit sanaartorneq. Ingeniøritut, illuliassanik titartaasartutut siunnersortit aammalu suliffeqarfiit mikisut immikkut ittumik suliaqartut amerlapput. Taamaammat savalimmiormiut suliffeqarfii sanaartornermik ingerlatsinermillu suliassat, aammali Kalaallit Nunaanni suliassat ilisimasatigut oqimaannerusut maanna siunissamilu ingerlanneqartussat  soqutiginerusariaqarpaat, Edmund Joensen isumaqarpoq.