Savalimmiormiut tunngaviusumik inatsisissatut siunnersuusiartik inatsisinut atortitsinermut ministereqarfimmit arlaleriarlutik akueriteriaraluareerlugu maanna iluatsereerpaat.

Tamannalu nunatsinni politikerinut, tunngaviusumik inatsisissaq pillugu isumalioqatigiissitami ilaasortaasunut, Naalakkersuisut suliakkiinnerat napertorlugu marlunnik alloriarnilimmik tunngaviusumik inatsisissatut siunnersuusiortussanut, aqqutissiuisinnaasoq, ilisimasalik isumaqarpoq.

- Marlunnik alloriarnilimmik tunngaviusumik inatsisiliorniaraanni, taava tunngaviusumik inatsimmik inatsisitut minerusumik annerusumilluunniit atuussinnaassusilimmik uani periarfissaqarpoq, tunngaviusumik inatsisinik ilisimasalik Ilisimatusarfimmilu adjunktiusimasoq, Jens Wendel-Hansen oqarpoq.

AAMMA ATUARUK Tunngaviusumik inatsisissatut siunnersuut akuerineqartoq

Savalimmiormiut siunnersuutaat inatsisinik atortitsinermiut ministereqarfimmit ajunngitsutut oqaatigineqarpoq, tunngasivumik inatsisit allat, Savalimmiunut atuuttut atorunnaarsinngimmagit.

Taamaaliornerlu nunatsinni aqqutissaasinnaasoq, Jens Wendel-Hansen oqarpoq.

- Aamma taamatut Kalaallit Nunaannut tunngaviusumik inatsisiliortoqarsinnaavoq, danskit tunngaviusumik inatsisaata ataani atuussinnaasumik, Jens Wendel-Hansen oqarpoq.

AAMMA ATUARUK Tunngaviusumik inatsisissaq pillugu isumalioqatigiissitaq Islandimut tikeraartoq

Nalornisitsisinnaasoq

Taannali savalimmmiormiut tunngaviusumik inatsisissatut siunnersuusioriaasiannut mianersoqqusivoq.

Savalimmiormiummi tunngaviusumik inatsisissaat imaluunniit danskit tunngaviusumik inatsisaat atuutissanersoq isummerfigineqanngilaq. Tamannalu nalornisitsisinnaasoq, Jens Wendel-Hansen oqarpoq.

- Eqqartuussivimmi qanoq paasineqarsinnaassusia ersernerluttortarpassuaqarpoq, tamannalu ulorianaatigaa, Jens Wendel-Hansen oqarpoq

Savalimmiunut tunngaviusumik inatsisissatut siunnersuut Lagtingimi maanna oqallisigineqarsinnaalereerpoq, innuttaasullu 2018-imi taasissutigissagaat naatsorsuutigineqarpoq.

AAMMA ATUARUK Tunngaviusumik inatsit akisusinnaasoq