Savalimmiormiut pinerluttarnerannit

Savalimmiuni politiit ukiumoortumik nalunaarusioreernerisa kingorna erserpoq Savalimmiuni inatsisinik unioqqutitsinerit ilaatigut ikiliartorlutillu qaffariartoqarsimasut.

Savalimmiuni pinerluttuliornerit qaqutigoortuupput, ukiullu 18-t ingerlanerini toqutsisoqarsimanngivippoq.

2005-illu ingerlanerani inuit 979-t pillaanermut inatsimmik unioqqutitsisimapput, kisitsisillu taassuma takutippaa, ukiumut siulianut sanilliullugu Savalimmiuni inatsisinik unioqqutitsinerit 11 procentimik appariarsimasut, tamannalu peqquteqarpoq tillinniarnerit aserorterinerillu ikileriarsimammata.

Ikiaroornatulli Savalimmiuni atugaanera aamma allanngoriaateqarsimavoq, ikiaroornartoq ecstasy Savalimmiuni atugaallualersimammat.

Iisartakkat ikiaroornartut ecstasy-t 2005-p ingerlanerani 537-t arsaarinnissutigineqarsimapput, 2004-mi arsaarinnissutaasut ikinnerungaatsiarput tassa 30-t arsaarinnissutigineqarsimammata. 2003-imilu ecstasy-mik arsaarinnittoqarsimanngivilluni.

Aammattaaq ikiaroornartoq haship atugaanera Savalimmiuni qaffariarsimavoq, 2005-imi 5,7 kilo arsaarinnissutaavoq, 2004-mi 3 kilo arsaarinnissutigineqarluni.