Savalimmiormiut nunatsinni uuliasiulerusupput

Ullumilu pingasunngornermi sisamanut naapissavaat Nuummi Sulisitsisut. Sulisitsisut Peqatigiiffiata GA-p pisortaa Henrik Leth tikeraartut pillugit ima oqarpoq.

- Faroe Petroleum uatsinnut saaffiginnippoq, inuussutissarsiutinik ingerlatsisunik naapitserusulluni, tamannalu ullumi piviusunngortissavarput, Henrik Leth oqarpoq.

Nuummi suliffeqarfiutillit 25-t peqataaniarlutik saaffiginnissimapput.

- Amerlassusaat naammaginaqaaq. Faroe Petroleum piginneqatigiiffeeraagaluarluni uagut isitsinni angeqaaq. Tassami piginneqataassutaasa nalingi aningaasanik niuerfimmi danskit koruuninngorlugit 1 milliardi sinneqarput, nassuiaavoq.

Savalimmiormiut Kalaallit Nunaanni uuliasiortitseqatigiiffimmik pilersitseqataasussarsiorput.

- Naapisitsinerput kinguneqassanersoq suli Sulisitsisut Peqatigiiffiannit naluarput. Pissarsiaqarnissarput qularnanngilaq. Savalimmiuni uuliasiortitseqatigiiffimmik pilersitsiniarnerminni qanoq iliorsimanersut qanorlu ullumikkut ingerlanersut paasisaqarfigissavarput. Immaqalu allaat suleqatigilersinnaallugit, GA-mi pisortaq Henrik Leth nassuiaavoq.

Faroe Petroleum inunnik pingasunik angalatitaqarpoq, taakkulu Aatsitassaqarnermut pisortaqarfik, Nuna Oil, inatsisilerituut suliffeqarfiillu naapeqatiginiarpaat. Kalaallit Nunaanni uuliasiortitseqatigiiffik nutaaq pilersinneqassappat ilimanarpoq uuliasiorfissatut aappaagu neqeroorutissat marluk arlaat, West Greenland Licensimik taagukkat, qinnuteqarfigineqarsinnaassasut.