Assi: © 2016 Føroya landsstýri

Savalimmiormiut nunanut allanut ministeriata Danmark tupaallaatigigaa

Savalimmiut, Nunatta Islandillu akornanni suleqatigiinnissamik isumaqatigiissummi pineqartoq Danmarkip ingasaallugu paasivaa. Savalimmiormiut nunanut allanut ministeriat, Poul Michelsen taama isumaqarpoq. Politikki pinnagu 'juramut saatinneqarpoq', ministeri taama isornartorsiuivoq.

- Ukiorpassuarni taamatut periaaseqarpugut, isumaqarpungalu ingasaassingaatsiartoqartoq.

Savalimmiormiut nunanut allanut ministeriat, Poul Michelsen, Danmarkip suleqatigiinnissamik isumaqatigiissummut Savalimmiut, Nunatta Islandillu Nunat Killiit Siunnersuisoqatigiivini ukioq manna aggustip qaammataani atsioqatigiissutigisaannik atorunnaarsitsineranut qisuariaateqarluni taama oqarpoq.

Isumaqatigiissummi atuarneqarsinnaavoq nunat pingasuusut suliat ataatsimoorlutik soqutigisaqarfigisatik, assersuutigalugu nunanut allanut politikki, atorfilittatigoortumik ministeritigoortumillu oqaloqatigiissutigisassagaat.

Danskilli nunanut allanut ministereqarfiata tamanna akueriumanngilaa, nunanut allanut politikki susassaqarfiummat Kalaallit Nunaannit Savalimmiuniillu suli tiguneqarsimanngitsoq tiguneqarsinnaanngitsorlu, danskit nunanut allanut ministereqarfiat KNR-imut akissuteqarluni taama allappoq.

AAMMA ATUARUK Isumaqatigiissut Naalagaaffeqatigiinni nunanut allanut politikkikkut assortuussutaalersoq

Isumaqatigiissulli siunniussat pillugit nalunaarutaannaavoq isumaqatigiissutinillu pituttuisunik imaqarani, Poul Michelsen taama oqarpoq.

- Politikkimik eqqartuiniarsarivugut. Tamannaana pineqartoq. Isumaqatigiissullu una uagut Danmarkillu akornanni juramut saatinniarsarineqarpoq, tamannalu isumaqarpunga asuli oqalunnerusoq (…). Imarisaa nunat akornanni inatsisinut aalajangersimasunut arlaatigulluunniit pituttorsimanngilaq.

Poul Michelsen: Samuelsen paasisaqanngilaq

Nunanut allanut tunngasunut susassaqarfik pillugu immikkoortup saniatigut, isumaqatigiissuteqartoqannginnerani Danmarkimit atuaqqaarneqarsimasariaqaraluartoq, nunanut allanut tunngasunut ministereqarfiup KNR-imut ilisimatitsissutigaa, Savalimmiut Danmarkillu akornanni nunanut allanut tunngasunut isumaqatigiissutit pillugit kaajallaasitaq innersuussutigalugu.

Nunat avannarliit killiit Siunnersuisoqatigiivini isumaqatigiissutigineqartoq Savalimmiuni Lagtingimut, Lagtingip nunanut allanut ataatsimiititaliaanut Nunatsinnilu Inatsisartunut saqqummiunneqarsimanngilaq - pituttuisumik isumaqatigiissuteqartoqannginnera tamatumunnga pissutaavoq, Poul Michelsen taama oqarpoq.

- Savalimmiuni aamma inatsisilerituunik sulisoqarpugut, aamma nammineq nalilersuisinnaavugut. Isumaqarpugullu kukkunerusoq (…). Taamaammat Nunani avannarlerni killerni suleqatigiinnermut matumunnga akuleruttoqarnera paasisinnaanngilarput, aamma Danmarkip peqataaffiginngisaannarsimavaa, qujanartumik, siunissamimi taamaattoqassappat taama oqartariaqarpunga.

AAMMA ATUARUK Savalimmiuni naalakkersuisoq issittoq pillugu ataatsimiinnermut takkutinngitsoq

Poul Michelsen danskit nunanut allanut tunngasunut ministeriat suliaq pillugu oqaloqatigiartorlugu qanittukkut Københavniliarpoq.

- Anders Samuelsen oqaloqatigiartorlugu pisarissersorlunga ornippara, ukulu inatsisilerituut isumaqatigiissutip siunertaanik inatsisitigut immikkoortiteriniarsarigut avaqqunniarsarigaluarpakka. Ministerilli aamma paasisimanngimmagu nikalluallaatigaara.

Michelsen: Isumaqatigiissut suli atuuppoq

Nunanut allanut naalakkersuisup Suka K. Frederiksenip danskit nunanut allanut tunngasunut ministereqarfiata isumaqatigiissummik paasinninnera aamma apeqquserpaa.

Suleqatigiissutigaluguli aaqqiissuteqarnissaq pillugu nunanut allanut tunngasunut ministereqarfik Namminersorlutik Oqartussanit oqaloqatigineqarpoq.

Michelsenip Danmarkip taamatut akuliunnermigut isertukkaminik siunertaqarsinnaanersoq eqqarsaatersuutigaa. Taannami isumaqarpoq Issittup sammineqarnerata annertusiartuinnarnerani Danmark navianartumik inissisimasoq, Savalimmiunimi Nunatsinnilu namminerisamik tunngaviusumik inatsiseqalernissaq sulissutigineqarmat. Aamma Brexit piviusunngoriarpat nunat atlantikup avannaamiut Tuluit Nunaannut Danmark avaqqullugu aalisagartassiissutit pillugit isumaqatigiinniarnissaat qalliartorpoq.

AAMMA ATUARUK Issittumi ineriartortitsinissaq politikerit oqaluuseriniaraat

- Sorpassuarnik takorluugaqarsinnaavunga. Kalaallit Nunaanni Savalimmiunilu tunngaviusumik inatsisiliornissaq sulissutigineqarpoq. Aamma ’mianersortariaqalerpusi’-mik killiliinerusinnaavoq. Sunarpiaq siunertaanersoq soorunami eqqoriaqattaarusunngilara. Isumaqarpungali asuli oqalunnerusoq, Poul Michelsen taama oqarpoq. 

Taanna aamma isumaqarpoq Danmarkip Atlantikup avannaani suleqatigiinneq sakkukillisarniarsarigaa.

- Nunani avannarlerni killerni suleqatigiinneq ilisimasaqarfigigaanni, taava suleqatigiinneq Nunanut allanut tunngasunut ministereqarfiup ersersitaanit annerusumik ataqqineqartariaqarpoq. Tamannalu tupaallaatigilluinnarpara, aamma taama ikkatsigisumik eqqarsartoqarsinnaanera ilimagisimanngikkaluarpara.

Poul Michelsenip Nunat avannarliit killiit siunnersuisoqatigiivini isumaqatigiissutigineqartoq suli atuuttutut isigalugu oqaatigaa.

- Isumaqatigiissut suli atuuttutut isigaara, allamik oqarusunngilanga. Taamatulli toqqammavilimmik danskit mistereqarfiannit naveerneqarnissaq - akuerinngilluaasarpara, Poul Michelsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat