Savalimmiormiut nunani avannarlerni rekordtiliisut

novembarip 03-at 2006 06:10

Nunat avannarliit eqqarsaatigalugit Savalimmiormiut rekordtiliipput. Nunat avannarliit ukiumoortumik nalunaarusiaanni allassimavoq, nunanut avannarlernut allanut naleqqiullugu Savalimmiuni meeqqiortoqarnerpaasoq, aappariinni katissimasuni avittoqannginnerpaasoqartoq, naartuersittoqannginnerpaasoq, imminullu toquttoqannginnerpaalluni.

Savalimmiormiut 48.000-iupput, arnartaasalu meeqqiorsinnaanerat agguaqatigiissillugu naatsorsoraanni, arnaq ataaseq inuunermini 2,6-nik meeqqisarpoq.

Savalimmiuni siorna 2005-imi 29-t siornaallu 2004-mi 37-t naartuersissimapput.

Savalimmiuni ukiuni tallimani kingullerni imminut toqussimasut agguaqatigiissinneqarmata 2,8-it imminorsimapput.

Nunat avannarliit ukiumoortumik nalunaarusiaanni aamma allassimavoq, Savalimmiuni innuttaasut 16-iniit 64-inut ukiullit 90 procentii suliffeqartuusut.