Savalimmiormiut nappaatinut tunngasunik misissuivigineqalerput

juulip 24-at 2007 06:56

Savalimmiormiut, ukiuni untritilinni arlalinni ikittunnguullutik inuiaqatigiinnguusimasut avinngarusimasut, ilalisaatiminnik, tassa kinguaariinni timikkut kingornussisarnermut tnngasunik, arlalissuarnik misissuivigineqarnialerput.

Misissuineq siulleq aggustimi pissaaq, nappaatit assigiinngitsut kinguaariinniissinnaasut misissuivimmi nutaami misissuivigineqassallutik.

Misissuivimmi pisortaq, Sigurd Ólason Vang, Savalimmiuni aviisimut Dimmalættingimut oqarpoq, isiluutit assigiinngitsut sisamat, savalimmiormiunit arlalissuarnit nappaatigineqartartut, ilisimatuussutsikkut misissuiffigineqarnissaat pilersaarutaasoq. Naalagaaffiup Isinut Misissuisarfia, Kennedy Institut, Danmarkimi Hellerupimiittoq, aamma Tysklandimi Hamburgimi ilinniarnertuunngorniarfiit ilaat tassani misissuisuussapput.

Savalimmiormiut taama misissuiffigineqarnissaminnut piukkunnarluinnartuupput, inuiaqatigiinnguimmi taakku 48.000-ngajaasut, kinguaariit arlallit kingumut qiviaraanni ilaqutariiaarsinnaammata.

Tassa isilunnerup kinguaariinniissinnaanera siullermik misissuivigineqassaaq, tullinnguutissalluni autisme. Taava ersinermik annilaanganermillu nappaateqartarneq pingajuattut, kiisalu sisamaattut misissuivigineqartussaq tassaassaaq aakkut aalajangersimaqqissaartumik kræfteqalersarneq.