Savalimmiormiut naatitagupput
Savalimmiuni anorersuarnera pissutigalugu umiarsuit assartuutit naatitanik pisarnertut sapaatip akunneranut tikiussisinnaasimanngillat, savalimmiormiullu naatitanik nutaanik taamaalillutik pisisinnaasimanngillat.
Atlantikup avannarpasissuani imaq unerisimanngeqaaq, Danmarkillu sineriaata kitaata avannarpasissuani anorersuarnera pissutigalugu, umiarsuarmut ilaasartaammut, Norrønamut, inuit 300-t Hanstholmimiit Tysklandimi Bergen aqqusaarlugu Torshavniliartussat ulluni arlalinni aallarsinnaasimanngillat.
Norrønamik piginnittoq, Smyril Line, nalunaarpoq, anorersuit kaavittuliortut, tamatumalu kingunerisaanik malerujussuit, taavalu anorip sammivia ajoqimmat, umiarsuup aallarnissaa kinguaqattaartoq. Umiarsuup kinguaattoornera pissutigalugu Islandimut angalanissaraluaq aamma taamaatiinnarneqarpoq.
Atlantikup avannarpasissuani ulluni kingullerni anorersuarnera maanna qaangiussimalerpoq, ullumikkullu anoreqarani seqinnarippoq, umiarsuillu tamakkiillutik Savalimmiut tungaanut maanna ingerlaarput.
