Savalimmiormiut meeqqiorluarput

Qeqertarmiulli inuiattut ullorsiuinnarneq ajorput. Savalimmiormiut aviisiat Sosialurin sullillugu Savalimmiuni Naatsorsueqqissaartarfiup misissuineratigut paasineqarpoq, ukiut tamaasa Olajfestep kingornagut, qaammatit qulingiluat qaangiukkaangata Savalimmiormiuararpassuit inunngorartartut.

Ukiut kingulliit 22-t ingerlanerini, ukiut tamaasa apriilip naalernerani meeqqat 385-it missaanniittut Savalimmiuni inunngortarput. Piffissami tamatumani inunngortartut qaammatinut allanut sanilliullugit amerlanerupput. Savalimmiormiut eqqaamasaannik ilisimatusartoq, ilisimatooq Savalimmiunilu Universitetip pisortaa Joán Pauli Joensen oqarpoq, piffissami tamatumani naartusorpassuaqalertarneranut pissutsit arlallit patsisaasartut, soorlu nalliuttorsiornermi qiimmassimaarneq, aasaanera, imigassaq kiisalu nalliuttorsiornermi Savalimmiormiunik qeqertani allani najugalinnik naapitsisarneq.

Olajfestep nalaani meeqqiornerup saniatigut soqutigineqarluartartoq tassaavoq iporsuulluni ajugaaniunneq, tamannalu Torshavnip talittarfiani ualimut ingerlanneqassaaq.

Inuiaat nalliuttorsiornerat aqagu unnuarorpat sakkortunerpaaffimminiilissaaq, tassa nalliuttorsioqataasut erinarsoqatigiinniarlutik Torshavnip qeqqanut katersuuppata. Taamaalippat tasiorrattorsuullutik Torshavnip aqquserngisigut erinarsuutitoqqatik taallarpassuallit erinarsussagamikkik.

Savalimmiuni Inatsisartut aamma aqagu ataatsimiilissapput.