Savalimmiormiut itigarput
Savalimmiuni uuliasiornermut ministeri, Johan Dahl, Savalimmiuni aviisimut Sosialurinimut ima oqarpoq:
- Kalaallit Nunaanni uuliamik ujaasinerup soqutigineqarnerujussua Savalimmiuni nuannaarutigeqaarput. Matumani qinnuteqartitsinermi Faroe Petroleumip iluatsitsinnginnera ajuusaarnarpoq, taamaattorli kalaallit naalakkersuisuisa aalajangiinerat ataqqivarput.
Uuliasiornermut ministeri isumaqarpoq, Savalimmiut aamma Kalaallit Nunaat assigiissuteqaqisut, tassami nunat taakku marluk pisortatigut ingerlatsineri sullissinerilu annikitsuummata, taamaattumillu uuliasiornikkut misilittakkanik paarlaateqatigiinnikkut iluaqusersinnaagaluarlutik.
- Kalaallit Nunaanni uuliamik ujaasinermut akisussaasoq, Ove Karl Berthelsen attaveqarfiginiarpara, suleqatigiinnerusinnaanerput oqaloqatigiissutiginiassagatsigu, suliffissuaqarnermut nutaamut kiffartuussinerit, uuliamillu ujaasinerit, pillugit oqaloqatigiissinnaaniassagatta, Johan Dahl oqarpoq.
Naalakkersuisut siulittaasuat Kuupik Kleist Atuagagdliutinut ippassaq saqqummersunut oqarpoq, uuliamik ujaasiniartunut arfineq-marluusunut akuersissuteqarnertik "aalajangeeqataaffigisami annerpaat ilagigaat".