Savalimmiormiut Issittumi Siunnersuisoqatigiit ataatsimiinnerann peqataaginnassapput
Ministerit Sverigemi Kirunami ataatsimeereersullu, Savalimmiuni Naalakkersuisut siulittaasuat Kaj Leo Holm Johannesen, taama oqarpoq:
- Ataatsimiinnermut peqataajartorpugut, isummavullu saqqummiukkiartorlugit. Peqataannginnerminngaanniit tamanna pitsaanerusoq isumaqarpugut. Tassa uagut isumarput, Kalaallit Nunaata isummani nammineq soorunami pigiumaarpaa, tamannalu ataqqissavarput. Atorfilittatigoortumilli suliniuteqarnerup Sverigerip siulittaasunngornerani ajornarnerulersimasoq uagut aamma isumaqarpugut. Tamassumali allanngortinneqarnissaa pillugu Danmarkimi Kalaallit Nunaannilu naalakkersuisut suleqatiginiarpavut, Savalimmiuni Naalakkersuisut siulittaasuat Kaj Leo Holm Johannesen, oqarpoq.
Naalagaaffeqatigiit ataatsimiinnermi pingasunik inissaqarput, naalakkersuisullu siulittaasuat Aleqa Hammond ataatsimiinnermi peqataasimasuuguni taamaasilluni inissaqarsimassagaluarluni.
Sverigelli siulittaasuunerani atorfilittat Senior Arctic Officialsinik taaguutillit, naatsumik SAO-mik taagorneqartut, ajornartorsiorfiusimapput, Kalaallit Nunaat Savalimmiullu matumani ilaasinnaatitaasimanatik.
- Naligiittut soorunami ilaasariaqarpugut. Issittup 20 procentia Kalaallit Nunaannit Savalimmiuniillu pigineqarpoq. Ataatsimiinnermi maanna peqataanissarput siunniupparput isummavullu saqqummiullugit. Peqataannginnerminngaanniit ajunnginneruvoq, Kaj Leo Holm Johannesen oqarpoq.
Naak Kaj Leo Holm Johannesen oqalugiartussaanngikkaluarluni, Danmarkip nunanut allanut tunngasunut ministeriata Villy Søvdalip oqalugiarnermini Kaj Leo Johannesen ilaatigut oqaaseqartippaa. Savalimmiormiullu Issittoq pillugu isummatik Issittumi Siunnersuisoqatigiit ataatsimiinneranni taamaasillutik saqqummiuppaat.
