Savalimmiormiut ilinniarsimasut nunaminnut utertanngillat

-Savalimmiormiut nunaminniit allamut nuukkaangamik sooq utertannginnersut assut ajornartorsiutigaarput. Maannalu paasiniarnialerparput tamanna qanoq aaqqiivigisariaqarlutigu. Taama oqarpoq politikeri republikaneriusoq, savalimmiormiullu Danmarkimi Folketingimi maanna ilaasortaatitatuarisaat, Sjudur Skaale.

Torshavnip Kommunia taavalu Danmarkimi naatsorsueqqissaartarfik suleqatigalugu Sjudur Skaale misissuisitsinialerpoq. Savalimmiuni innuttaasut ullumikkut 48.000-it missaanniipput, taavalu 15.000-it 20.000-illu akornanniittut nunani allani najugaqarput – amerlanerit Danmarkimi. Taakku affaasa missaat Savalimmiuni inunngortuupput alliartorsimallutillu.

-Savalimmiuni innuttaasut amerleqqinnavianngillat. Utoqqaat inuusuttunit amerlanerupput, angutillu arnaniit amerlanerullutik. Equngassut tamanna iliuuseqarfigisariaqarparput, Sjudur Skaale oqarpoq, erseqqissaatigaalu amerlanerit ilinniagaqarluarsimasut Savalimmiunut uterusunneq ajortut.