Savalimmiormiut aningaasaateqarluarput

Savalimmiormiut 48.000-ingajaasut nunanut allanut akiitsui pigisaallu kingullermik naatsorsorneqarmata, takuneqarsinnaavoq, Atlantikup avannarpasissuani Qeqertami tassani najugallit katillugit 3,7 milliardi koruuninik nunarsuatsinni 2006-imi pigisaqarsimasut. Nutaartaasorlu tassaavoq, savalimmiormiut 1,7 milliardi koruuninik nunani allani aamma piginneqatiginnissuteqartut.

- Aningaasat amerlassusaat ajunngeqaaq. Tassa Savalimmiut aningaasarliulissagaluarunik aningaasat taakku iluaqutigissaqaat, Savalimmiuni aningaaserivissuarmi pisortaaneq, Sigurd Poulsen oqarpoq.

Savalimmiormiut nunanut allanut qanoq akiitsoqartiginersut, qanorlu amerlatigisunik pigisaqarnersut, ukiuni arlaqalersuni aatsaat naatsorsorneqarpoq. Aningaaserivissuulli pisortaanerata, Sigurd Poulsenip, uggoraa, aningaasanit taakkunannga taama ikitsigisut Savalimmiunut aningaasaliissutaasarmata.

- Tamanna tupigusuutigaara. Kissaatiginassagaluarpoq Savalimmiunut amerlanerusunik aningaasaliissuteqarnissaa, savalimmiormiut inuussutissarsiornerat taamaalilluni nukittorsarneqarlunilu ineriartortinneqassagaluarmat, Sigurd Poulsen, nutaarsiassaqartitsivik Ritzau naapertorlugu oqarpoq.