Savalimmiormiut aamma amigartooruteqassapput

Kalaallit Nunaat aningaasanut inatsisissamini kisimi amigartoorneq ajorpoq. Savalimmiormiut aningaasanut inatsisissatut siunnersuumminni milliardip kuartianik amigartoortussanngorput.
Allattoq Mads Lynge
oktobarip 08-at 2008 17:06

Savalimmiuni aningaasaqarnermut naalakkersuisunngorlaap, Socialdemokratit siulittaasuata Jóannes Eidesgaardip, aappaagumut aningaasanut inatsisissatut siunnersuut 244 millioni koruuninik amigartoorfiusussaq saqqummiuteqqammerpaa.

- Aningaasarsiornikkut ingerlatsinerput siunissami neriunartoqarpallaanngilaq. Aningaasarsiornitta siuariartornerata uninnissaa naatsorsuutigaarput. Aalisakkanik tunisassiorneq ingerlalluanngilaq inuillu aningaasanik atuinerat minnerulissaaq. Naak suliffissaaleqisut ikittuinnaagaluartut, amerleriarnissaat naatsorsuutigineqarsinnaavoq, Jóannes Eidesgaard oqarpoq.

2009-mut aningaasanut inatsisissatut siunnersuut nutartigaavoq. Tassami Savalimmiuni naalakkersuisut nutaat ivertinneqaqqammermata. Taamaattumik naalakkersuisoqatigiit siunnersuut aamma suli oqaluuserinngilaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq