Savalimmiormiut aalisaqqusaajunnaarput
- Naalagaaffeqatitta ilaannut EU-p killilersuinera soorunami naalakkersuisunit ajuusaarnartutut isigaarput, Inuussutissanut Qallunaat ministeriat, Mette Gjerskov taama oqarpoq.
Nunat EU-mut ilaasortat ullaatungaa ataatsimiinnerminni, Savammimiormiut ammassarsuarniarsinnaanerat killilersorneqalissasoq aalajangiiffigaat.
Tamanna pivoq, Savalimmiormiut ammassarsuartassaminnik avaleraasartuunillu, aamma makrelinik pisagaannik, imminnut pisassinnerisa kingorna, taamaaliornerlu nunat tamalaat isumaqatigiissutaannik unioqqutitsineruvoq.
Killilersuilernerup suut kingunerissagai suli iluamik inissivinneqanngillat, ilisimasarpulli tassaavoq, nunanut allanut ammassassuarnik niuernerup mattunneqarnissaa ukiassalernerani atuutilersinneqassasoq.
- Isumaqarpunga killilersuinerup kinguneri taama annertutigisariaqanngitsut, pissuserissaarnerussaaq isumaqatigiinniarnerni tamanna aaqqinneqarpat.
Qallunaat Inuussutissanut ministeriata, Mette Gjerskov-ip aamma oqaatigaa, EU-p kommissioniata aalajangersagai Danmarkip malittariaqartarai aamma Naalagaaffeqatigiinnerup iluanut ajortumik kinguneqaraluarpalluunniit.
Savalimmiormiunut killilersuinerup EU-mit aalajangerneqarnerata kinguneranik, Savalimmiuni Naalakkersuisut maanna ataatsimiileruttorput. Savalimmiut Radioata tusagassiortuisa ilaata, Jon Brian Hvidtfeldt-ip, Savammiuni politikkut maanna pisut ima oqaluttuarai.
- Savammiuni Naalakkersuisunit qangali piumasarineqartaraluarpoq isumaqatigiinniarnikkut pissutsit aaqqinneqartariaqartut. Tamatumalu saniatigut Savalimmiormiut isumaqarput EU maanna pissusilersuutaat nunat tamalaat isumaqatigiissutaannut unioqqutitsinerusoq. Politikerillu suliassaat tulleq tassaavoq, mattussineq atorunnaarsinniarlugu eqqartuussivilersuussinissaq.
Jon Brian Hvidtfeldt taama nassuiaavoq oqaatigalugulu Savalimmiormiut politikeriisa pisinnaatitaaffitsik ilisimaarilluarlugu malinnialersaaraat.
- Ammassassuit avaleraasartuullu, makrelit Savalimmiut immartaanni amerlatsikkaluttuinnarput, tamannalu pissutigalugu Savalimmiormiut politikerii isumaqarput pisassiissutit annertunerusariaqaraluartut, Savalimmiormiu tusagassiortoq, Jon Brian Hvidtfeldt oqarpoq.
Savalimmiormiut maanna nalaataat tunngavigalugu, Qallunaat Inussutissanut ministeriat, Mette Gjerskov aperaarput, maani Nunatsinni assigusumik pisoqassagaluarpat, Qallunaat naalakkersuisuisa Nunarput tamakkiisumik tapersersussaneraat, taannalu ima akivoq.
- Pisut Savallimmiormiunut assigusut tamarluinnaasa isumaqatigiinniarnikkut aaqqinneqartarnissaat siunnersuutigissavara. Isumaqatigiinniarnerillu pisussaapput nunat sineriallit akornanni. Pisassanillu qaffaaniarnerit siunniunneqarsimappata soorunami tamanna aamma isumaqatigiinniarnertigut pisassasoq isumaqarlunga, Qallunaat Inuussutissanut ministeria, Mette Gjerskov taama naggasiivoq.
Savalimmiormiunut mattussinerit augustip aallaqqaataata kingorna atuutilersinneqassasoq naatsorsuutigineqarpoq. Tamatuma atuutilersinneqarnissaanut apeqqutit arlallit suli inissivinneqanngillat.