Savalimmiormiuaqqat atuagarsornikkut ingerlalluanngillat

Savalimmiormiut ajuusaarnartumik tupannartumillu paasisaqaqqammerput, tassa tusarliunneqarmat, meerartatik, meeqqat atuarfiini atuarnermik nalaanni, atuagarsornerup tungaatigut, pikkorlunnerpaanut ilaasut.

Atuartut pikkorissusaannik nunarsuaq tamakkerlugu misissuinerup, PISA-mik naalisarneqartartup, inernerini tamanut saqqummiunneqammersuni tamanna takuneqarsinnaavoq – Savalimmiuni ukiup ataatsip missaata matuma siorna taama misissuisoqarpoq.

Nalunaarusiami oqaatigineqarpoq, nunani tamalaani aningaasaqarneq ineriartortitsinerlu pillugit suliniaqatigiiffimmut, OECD-mut, nunani ilaasortani 35-ni meeqqanut sanilliullugit savalimmiormiut meerartaat atuagarsornerlunnerpaanut tulliusut. Mexicomiuaqaanngooq kisimik savalimmiormiuniit ajornerupput.

Misissuinermi aamma erserpoq, savalimmiormiut inuusuttaasa aaffaat kisimik qaffasinnerusumik ilinniagaqarnissaminnut piukkunnaateqartut, tassa ilinniarnertuunngornissamut, imaluunniit HF-imut HH-mulluunniit ingerlataqarnissaminnut.

Savalimmiuni meeqqanut atuartunut piumasaqaatit aamma annikippallaarnerarneqarput. Atuarfimmi susassaaleqisarput, meerarpassuillugooq eqqissiveqanngitsuullutik.