Savalimmiormiu ukiut arfinillit matuma siorna toqutsisimasutut pasineqarluni tigusarineqartoq

Savalimmiuni politiit niviarsiaqqap ukiut arfinillit matuma siorna toquneranut atatillugu angut ullumi pingasunngornermi tigusaraat, politiit taama paasissutissiipput.

Suliaq 2012-imi novembarimi aallartiffeqarpoq, taamani niviarsiaraq toqungasoq nassaarineqarmat. Tigusarineqartorlu aamma inuusuttuusoq politiit tusagassiorfinnut nalunaarutaanni atuarneqarsinnaavoq.

Politiit tigusarinninnerminnut atatillugu illut arlallit misissuiffigaat.

Angut tigusarineqartoq tigummigallagassanngortinneqassanersoq Savalimmiuni Eqqartuussivimmi eqqartuussisup aqagu sisamanngornermi aalajangissavaa. Eqqartuussineq Savalimmiuni nalunaaqutaq malillugu nal. 9.15 aallartissaaq.

Savalimmiuni politiit tigusarinnittoqarnera oqaaseqarfigiumanagu pingasunngornermi ualikkut nalunaarutigaat.

"Toqusoqarnera pasinartortaqartutut" tusagassiorfinnut nalunaarummi oqaatigineqarpoq, toqutsisimasutulli unnerluutiginnittoqarnera politimesterip tullersortaata Linda Hesselbergip Ritzauimut uppernarsarpaa.

Tigusarinninnerlu pingasunngornermi nal. 11.15 pissasoq aamma oqaatigaa.

Niviarsiaraq 16-inik ukiulik, Savalimmiuni qeqertat avannarliit ilaanni Viderømi, nunaqarfiup Hvannasundip eqqaani, 2012-imi novembarip qaammataani periarfeerunneqarpoq. Inuppassuit taamani ujaaseqataapput. Niviarsiaraq sapusiat eqqaanni toqungasoq nassaarineqarpoq, ipillunilu toqusimasoq aallaqqaammut inerniliunneqarpoq.

Tigusarinnittoqarnerali suliamut tassunga attuumassuteqarnersoq politiit pingasunngornermi uppernarsarumanngilaat.

Savalimmiuni toqutsisoqartarnera qaqutigoortuuvoq. Angut 36-inik ukiulik qeqertami Sudoroyimi nunaqarfimmi Hvalbami savimmik kapineqarluni 2014-imi aggustimi toqutaavoq.

Savalimmiuni ukiut 48-t ingerlanerini toqutsinerit quliupput.

/ritzau/