Savalimmiormiu OL-imut peqataanissaminut piareerpoq

Ippassaq nalulluni anngunniunnermi, Danish Openimi, savalimmiormiu Pál Joensen OL-imut peqataanissaminut ajornartorsiutiginagu annguppoq.
Pál Joensen i sit rette element. Assi © : KNR
Allattoq Bibi Nathansen
apriilip 17-at 2016 14:46

Taamaasilluni Rio de Janieromi aggustimi OL-ertoqalerpat savalimmiormiu nallorissorsuaq Danmark sinnerlugu peqataassaaq.

Nunatsinnitulli Savalimmiut nammineq erfalasortik sinnerlugu peqataasinnaanngillat, Danmarkili sinnerlugu OL-imut peqataasinnaallutik.

Minutsit 15-it sekundillu sisamat atorlugit Joensenip 1500 meterit naluppai, taamaasillunilu nallorissoq, 25-nik ukiulik, OL-imut peqataanissamut piumasaqaammiit 3,40 sekundinik sukkanerulluni.   

Pál Joenseni Londonimi 2012-imi OL-ertoqarnerani aamma peqataavoq. Taamani pakatsinartumik normu 17-inngorpoq, kisianni savalimmiormiup nunarsuarmi ungasissumut nallorinnerpaat maanna ilaanniilluni takutinniaqqilersinnaalerpaa.

Pál Joenseni Savalimmiuni ukialuit matuma siorna tikillugu naluttarfimmi sungiusartarsimavoq. Naluttarfiik taanna Nuummi naluttarfik, Malik, angeqqatigipajaagaaginnarpaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq