Savage Rose-kkunni nipilersortartoq toquvoq

Danskeq nipilersortartoq tusaamaneqarluartoq Thomas Koppel ippassaq toquvoq. Thomas Koppel nipilersoqatigiinni Savage Rose-kkunni nipilersortartuuvoq, Anisette-lu inooqatigaa nipilersoqatigisarlugulu.

Thomas Koppel nunatsinnut tunngasumik suliaqarluni aallartisarsimagaluarpoq.

Juaaka Lyberthip Thomas Koppel Aasivimmi 1985-imi naapeqqaarpaa, nunatsinnilu nipilersormata qanimut suleqatigaa, taamatuttaaq nunatsinnut tunngasumik suliassaraluanik suleqatigigaluarlugu.

- Malunnartorujussuugami nunarput annertoorujussuarmik uummateqarfigigaat, aammalu kalaallit kulturitoqaat assorujussuaq ataqqillugu. Taamaattumik suliassamik annertoorujussuarmik 2004-mi aallartittumik isumaqatigiissuteqarpugut. Taava 2005-p ingerlanerani ingerlassimasatsinni. 2007-imi Katuaq ukiuni qulinngortorsiortussaavoq taavalu pilersaaruteqarpugut annertuunik suliassanik ilaatigut nunatsinni nammineq kalaallit namminneq suliaannik isiginnaagassiornikkut nipilersornerillu saniatigut aamma nunarsuaq tamakkerlugu avammut saqqummiunneqarsinnaasumik suliassamik Anisette-kkut Thomas Koppelilu iminnikuuagut suleqatigiinnerpullu taamanili aallartippoq. Akuttunngitsumik ilaatigut sapaatip-akunneranut ataasiarluta arlaleriarlutaluunniit e-mailikkut attaveqarfigiittarluta, Juaaka Lyberth oqarpoq. Nangipporlu:

- Pinngortitamik nersorinninnermik qulequtserlugu suliaq isiginnaagassiaasussaasoq kalaallit oqaluttuatoqaannik imaqartoq, illuatungaatigullu aamma nutaamik ullutsinni isiginnaartitsinikkut periutsit atorlugit saqqummiunneqartussaq erinarsorneq qulliit allallu ullumikkumut scene-kkut pitsaalluinnaqqissaartumik takutinneqarsinnaasut atorlugit, Juaaka Lyberth oqarpoq.

Thomas Koppelip qimatarai aappani Anesitte panitillu marluk.