Savaatillit nunani allani nerukkaatissarsisariaqartarput

Nunarsuarmi silap kiatsikkiartornerata ilutigalugu sialuusatsikkiartorpoq, kinguneranillu savaatillit nunaataat panernerulerlutik. Savaatillit iImerterutissaqanngikkunik nerukkaatissanik nunanit allanit pisiniartariaqartarput, taamaammat immikkut ittumik iliuuseqartoqarnissaanik siunnersuusiortussanik sulisoqarnissaa, Atassummit siunnersuutigineqarpoq.

- Nunaatillit assorsuaq ajornartorsiorput, pingaartumik aasat kingulliit marluk panerujussuarnerata kingunersanik. Aasaq manna aamma taamaassappat ajutoorujussuarnermik kinguneqartussaavoq. Taamaattumik kingusinaartinnata suleqatigiissitamik pilersitserusuppugut, Atassummeersoq Finn Karlsen oqarpoq.

Siunnersuut Inatsisartuni ippassaq oqaluuserineqarmat, partiinit tamaangajannit tapersersorneqarpoq, Siumut kisimi pinnani.

- Nunalerineq pillugu siunnersuisoqatigiit, siunnersortit Savaatillillu Peqatigiit suliassaq pisinnaasartik naapertorlugu siumullu isigisumik ullumikkut suliaraat, Siumumeersoq Kim Kielsen oqarpoq, taamaammallu suleqatigiissitaliornissaq pisariaqanngitsutut isigalugu.

Kisianni suliassaq taakkua kisimik naammassisinnaanngikkaat, Finn Karlsen nassuiaavoq:

- Suliaat naleqartussaammata, suleqatigiissitat aamma naalakkersuisoqarfinniit ilaqartariaqarput, Finn Karlsen taama oqarpoq.

Siunnersuut piniarnermut, aalisarnermut nunalerinermullu ataatsimiititaliami suliarineqassaaq.