Savaatillit marluk nersornaaserneqarput
Erngup nukinga atorlugu nukissiorfeeraq innaallagissamik kiassarnermillu Qorlortukasimmi pilersuivoq. Savaateqarfik Qorlortukasimmiit kilomiiterinik ungasitsigisumiittoq Timerliit innaallagissamik aamma pilersorneqarpoq. Taamaalilluni ilaqutariit sisamat illui nukissiorfeeqqamiit innaallagissamik pilersorneqalermata orsussaq 22.000 literip missaa ukiumut sipaarneqartarpoq.
-Sulisimaqaasi, Nunami namminermi pissutsinut Naalakkersuisoq Anthon Frederiksen oqalugiarami ilaatigut oqarpoq. Andala Lund-ip Siiku Motzfeldt-illu nersornaatisinissartik ilimagisimanngikkaluarlugu qujassutigaat.
Nersornaatisisut tamarmik immikkut 15.000 kruunimik aningaasartalimik Qorlortukasimmi ippassaq, Nunami Namminermi pissutsinut Naalakkersuisumit Anthon Frederiksen-imit tunineqarput.
Namminersorlutik oqartussat avatangiisinik mianerinninneq pillugu nersorinnilluni akissarsititsisarnerat 2004-mi aallartippoq. Immikkoortut pingasut nersorinnissutigineqartarput.
Pinngortitamik avatangiisimillu mianerinninnissatsinnik ilisimaarinnilersitsineq qulequtaralugu Earth Charter Narsaq ippassaani tunineqarpoq.
Aamma aqagu pinngortitaq avatangiiserlu igitaqarfiunngitsoq qulequtsiullugu inunnik pingasunik isertugaagallartunik nersornaasiisoqartussaavoq.
