Savaatillit annerusumik perusukkaluarput

-Uagut aningaasartuutitta qaffariarsimanerat eqqarsaatigalugu taamatut qaffaanikkut aningaasartuutit tamaasa matussusersinnaallugit, taamaattumik isumaqatigiinniarnitsinni savap neqaata kiilumut 10 koruunimik qaffanneqarnissaa aallaavigivarput.

- Avataaninngaanniit tikisitassanut aningaasartuutigut ima qaffatsigisimapput allaat uagutsinnut ajunaarutaasussanngorlutik. Soorlu aamma uuliap akia annertunerulersoq, taamaammat aningaasatigut ajunaaruteqassanngikkutta neqi tunisarput qaffariaateqarluartussaagaluarpoq,

Savaatillit Peqatigiit suleqatigiissut siulittaasuat, Niels Lund, aperaarput, savaatillit aningaasarsiornerat qanoq inissisimanersoq.

- Akit qaffariarujussuarnerisa kingorna savaatillit aningaasarsiornerat ilungersunartorujussuuvoq, pinngortitattaaq pissusaa nalinginnaanngilaq.

Savaateqarfinni panernersuaqarpoq.

Nunarsuaq tamakkerlugu nunalerinermi pissutsit allanngorujussuarnikuupput.

Nioqqutissat nunalerinermi atugassagut, naggorissaatillu akitsorput.

Taamaammat allatut iliorsinnaannginnatta tunisassiatta akii qaffattariaqarput.

Taama oqarpoq Savaatillit Peqatigiit Suleqatigiissut siulittaasut Niels Lund.

Savaatillit ilaqutariikkuutaat ullumikkut 50-it missaanniipput, Neqi A/S-illu savat 21.000-it 22.000-illu akornanniittut pisiarissangavai.