VIDEO Savaatilinnut 37-nut katillugit 26 millionit tapiissutigineqartut

- Kalaallit Nunaanni nunalerinermik ingerlatsisoqarnissaa Naalakkersuisut qinertarpaat nunalerinerup tapiiffigineqarnissaanik aalajangiinikkut. Tapiissutinik tunniussisoqartanngippat savaateqarfiit tamarmik matusariaqalernissaat nalilerparput. Kalaallit Nunaannimi savaatillit tamangajalluinnarmik, tapiissutit ilanngaatigineqarpata, amigartooruteqartumik ingerlatsipput.

Nalunaarusiami Copenhagen Economicsimit suliarineqartumi, aviisip Atuagagdliutit pissarsiarisimasaani taama inerniliisoqarpoq.

Aviisi naapertorlugu, tapiissuteqarnermut aaqqissuussinerit maanna atuuttut ilumut naleqquttuunersut Naalakkersuisuinit isumaliutigineqarnissaat kaammattuutigineqarpoq.

- Inuiaqatigiit aningaasaqarneranni tapiissutinik tunniussisarneq pitsaanngitsumik sunniuteqarpoq, savaatilinnut ilungersunartorsiornerpaanut tunniunneqartarpat suli pitsaannginnerulersussamik: Savaatillit tunisassiakinnerusut amerlanerit taamaalillutik inuussutissarsiutiminnik ingerlatsiinnarsinnaassapput, allamik naammassisaqarfiunerusumik nassaarniarnissamut taarsiullugu, Atuagagdliutit naapertorlugit nalunaarusiami taama allaaserisaqartoqarpoq.

Taamarujussuarlu tapiissuteqartoqartaraluartoq, savaateqarfiit 2010-mi 43-sinnarlutik ullumikkut 37-nut ikileriarsimapput.