Savaatilik: Nersussuit siunissaapput
Ukiuni arlalinni savaateqarsimasoq ukiullu tulliani savaaqqanik Neqi A/S-imut tunisaqartarunnaartussaq tassaavoq Narsarmioq Sofus Frederiksen. Sofus Fredeiksen savaateqartarnini aappaagumiit unitsinniarpaa, nersutaateqarnerlu kisiat aalluniarlugu.
Aamma atuaruk Neqi A/S ikioqquvoq
- 1997-mi savaateqarneq aallartipparput, ukioq kingulleq tikillugu savaateqarpugut, maannakkut savaatigineqartut nungutaat pigineqarput ukiorlu naatinnagu nungoriarneqartussaapput, Sofus Frederiksen Narsami savaatilik aamma nersussuaatilik taama oqarpoq.
Nersussuaateqarneq 2010-mi aallartippaa
Nersussuup neqaanik tunisassiorneq Sofus Frederiksenip kisiat ingerlanniarpaa.
- Savaateqarneq nersutaateqarnerlu ataatsikkut ingerlanneqarsinnaanngillat, nunaminertaq atorneqartoq mikivallaaqigami, Sofus Frederiksen taama oqarpoq. Kujataani nersussuaatillit pingasuupput.
Nersussuit kinguaassiortinneqartarnerat sivisut aamma nunatsinnut nersussuarnik tikisitsisarneq akisuvoq tassami nersussuaq ataaseq tikisinniaraanni 25.000 kr-nik akeqarpoq. Sofus Frederiksen maanna 90-nik nersussuaateqarpoq.
Kalaallit Nunaani nersussuaateqarneq ajornaatsuinnaanngilaq.
- Nersussuit kinguaassiortarnerat savanut sanilliullugit sivusunerusaramik nersussuillu kinguaassiortinneqarnerannut utaqqikatannaveersaarpugut, Sofus oqarpoq.
Aamma atuaruk Nersussuup neqaa nunatsinneersoq pisiarineqarsinnaalissaaq
Sofus Frederiksen Narsaq nersussuup neqaanik Brugsenimut pilersuinissamut isumaqatigiissuteqarpoq taassumalu nutarterneqarnissaannut maanna isumaginiarnerit ingerlanneqarlutik.
Brugsenimik isumaqatigiissut 2010-mi atulerpoq.
Isumaqatigiissut Sofus Frederiksenimit iluarisimaarneqarpoq.
- Nersussuup toqunneqartup neqaata sumut tunineqarnissaa ilisimassallugu ajunnginnami,
nersussuaatilik Sofus Frederiksen taama oqarpoq.
Sofusip nulia Suka K. Frederiksen inatsisartuni ilaasortaavoq, savaateqarnerlu pillugu Naalakkersuisut isumaannik paasisaqarusulluni arlaleriarluni apeqquteqartarpoq.
Paragraf 37 naapertorlugu naalakkersuisunut apeqquteqaatini 1 juli tunniuppaa, tassani saavatillit tapiiffigineqarnissaannut aamma savaateqarnerup saniatigut uummasuutinut nutaanut aallarnissaanissamut suut periarfissaritinneqarnersut paaserusuppai.
