Savaatilik: ESU sumiippa?

Inuussutissarsiutinut tapiissuteqartarnermut ataatsimiititaliaq, ESU, sumiittoruna? Taama aperaaq savaatilik saaffiginnittaraluarluni akissutisineq ajortoq. Traktorit minnerit angumeriniagassanut naammakkunnaavissut anginernik taarserniarlugit Namminersornerullutik Oqartussanut qinnuteqartaraluarluni akineqarnissamut utaqqikatalivissoq, Qorlortukasimmi savaatilik Andala Lund, ima oqarpoq:

- Traktoritaarniarluta ukiut marluk matuma siornatigut qinnuteqarnikuugaluarpunga, taava akissutisinikuuvugut aningaasassaqanngimmat atukkinneqarsinnaanngitsugut.

Misileeqqilluta massakkut qinnuteqaateqarpugut, kisialli traktoritaarniarnitsinni neqeroorut pissarsiarinikuusarput marsip aallaqqaataanut killeqarmat qaangiullunilu akissutisinatalu, tassa unittutut immat paaserusuppara ilumut periarfissaaginnarnersoq taanna erhvervsstøtte atorfigisartagarput.

Andala Lund aamma oqarpoq, traktorit maanna atukkatik, ivigartartarnermi, nerukkaatissanik avataanit tikisittakkanik assartuinermi, savat nerlersornerinut allanullu atortakkatik, naammakkunnaavissut.

- Piffissaq sivisuukulooq atorlugu ivikkat assartortariaqartaratsigit, arlerniarsarigaluarpakka piffissaq aamma allamut atorusukkaluarlugu. Siuariartornissamut eqqarsaateqaraluarluni siuariaqqissinnaaneq ajorluni nukillaarnarpoq, nukillaarnartuuvoq.

Savaaqqat ukiumut tunineqartartut amerlisartuarnissaat nunatsinni anguniarneqarpoq - Andala Lundikkulli akimmisaartinneqartutut misigisimapput.

- Tassa savat massakkut, savaaqqat tunineqartartut, amerlisarniarneqarput ukiuni makkunani. Savaatigisagut amerlisarlugit ivigartarnitsigullu amerlisaalluta suliaqarpugut, kisianni sakkut pigisagut naammanngillat, taamatut annertunerusumik angusaqassalluta.

Andala Lund aamma oqarpoq, ESU-mit akissutisinissani utaqqigalualaariarlugu atorfissaminik allanik periarfissarsiorumaarluni.