VIDEO Savaatilik akiitsunik kingornussisoq
Akiitsunik kingornussineq oqitsuinnaanngitsoq savaatiliup Henrik Egedep oqaluttuaraa.
Henrik Egedep angummi savaateqarfia Qaqortup eqqaani Illorsuarniittoq 2003-mi kingornukkamiuk akiitsut 350.000 koruuniusut ilanngullugit kingornuppai.
- Savaateqarfik allamut paaritikkallarlugu illoqarfimmut suliartorlunga nuukkallartariaqarnikuuvunga, Henrik Egede KNR-imut oqarpoq.
Taassuma akiitsut kingornussimasani akiuni arfineq-pingasuni akilersortariaqarsimavai.
Aamma atuaruk Savaatilik: Nersussuit siunissaapput
Akiligassat artukkiisut
Savaateqarfiit 37-usut ataatsimut 26 millionit koruuninik pisortanut akiitsoqarput.
Savaateqarfiillu ingerlanneqarnerinut aningaasat savaatilinnut atukkiunneqarsimasut assigiinngitsunut atorneqartarsimapput.
Savaatillit akiitsuisa affai, tassa 13 miilionit koruuniusut, savaateqarfiit ingerlannerinut, maskiinanut assigisaannullu atorneqarsimapput.
Akiitsorineqartuni 8,32 millionit koruunit savaatillit illuinut, savat inaannut assigisaannullu atorneqarsimapput.
Akiitsorineqartullu sinneri 4,68 millionit koruunit savat nerisassaannut, imermut, innaallagissamut naggorissaatinullu ilaatigut atorneqarsimapput.
Akiitsoqarneq pissutaalluni savaateqarneq immikkut aningaasaliiffigineqanngippat savaateqarneq imminut akilersinnaanngitsoq Nunalerineq pillugu siunnersuisooqatigiinni siulittaasup Niels Lundip Qanoruumut oqaatigaa.
