Savaateqarneq ukiuni 100-nngortorsiorneqassaaq

Savat angutikuluut marluk savaaqqallu qulit 1906–mi Savalimmiuniit nassiunneqartut, kujataani inuussutissarsiummik pingaarnerpaamik ullumikkumut kinguneqarput.

Savaateqarnerup nunatsinni ukiunik 100-liineranut atatillugu nallittorsiornerit Nanortalimmi junip naalernerani ingerlanneqassapput, nallittorsioqataasussat katillutik 400-t missaniittut peqataaffigisaannik.

Kenneth Høegh, Nunalerinermi Siunnersuisoqatigiit ataani siunnersortaaneq oqarpoq, ukioq manna Savalimmiuniit Island-imiillu tikisitanik nalliuttorsiornerup nalaani oqalugiartoqassasoq.

Ilaatigut Islandimiumit oqalugiaatigineqassaaq, savaateqarfinni neriniartitsivinnik misissuisimanerit.

-Ingvi Thorsteinson ukiut arlallit savanik neriniartitsiviit misissornikuuvai ´70 –sikkunni 1980-kkunnilu missuingaatsiarnikuuvoq. Aamma tassa taakkua misissuinerit tunngavigalugit, savaateqarnermut pilersaarusiornerit sananeqarnikuupput. Aamma misissuinerit taamanikkut suli ullumikkut pingaaruteqartorujussuupput atorneqarlutillu. Tassa tamakkua pillugit Ingvi oqalugiassamaarpoq.

Island-imiunut Savalimmiormiunillu taama qanitsigisumik suleqateqarnissaq sooq taama pingaartinneqartiginersoq, Kenneth Høegh aperineqarama akivoq.

-Annerpaamik immaqa oqarsinnaavugut Island –ip silaannartaa maana Kujataata silaannaata assigigaa.Taava aamma savaataat uagut savaatitta assigaat, tassuunatigut soorunami aamma assigiinngitsorpassuit suleqatigiissinnaavugut.

Johannes Dalsgård Valbastad-imeersoq Savalimiuni savaateqarneq pillugu oqalugiartussat ilagaat. Ukiut 100–t matuma siorna savat siulliit nunatsinnut nassiunneqartut Valbastad–imeersuupput.