Savaaqqat 22.000-it tunisassiarineqassapput
Savaaqqat 22.000-t tungaanut amerlatigisut ullumimiit toqorarneqalissapput, taakkulu Neqi A/S-mut tunineqarneranni savaatillit kiilumut 39 koruunit missaannik pissarsissutigissavaat.
Allattoq Louise M. Kleemann
Savaaqqat 22.000-t neqaat katillugu 325 tonsi tunisassiarineqassaaq. SPS-ip akinik isumaqatigiinniartartui Narsami toqoraavimmut Neqi A/S-imut isumaqatiginninniarnerminni savaaqqap neqaata akia kiilumut 3,55 koruunimik qaffassasoq aalajangiuppaat.
Savaatillit kiilumut 10 koruunnnimik qaffaanissaq angorusussimagaluarpaat, aningaasartuutit allanisuullu ukiuni kingullerni amerligaluttuinnarsimammata.
SPS-imit oqaatigineqarpoq savaatillit naggorissaatissanut aningaasartuutigisartagaat ukiup ataatsip ingerlanerinnaani 65 procentimik qaffassimasut, taamatuttaaq nerukkaatissat akii 30 procentimik qaffariarsimasut.