Saudi Arabiami peqqarniisaarnianik aatsaavik eqqartuussineqarpoq

1990-ikkulli qiteqqunnerannit Saudi Arabia qaartartumeerisartunit Al-Qaedamit illersaannillu USAmut kitaamiunullu nalinginnaasumik akerliusunit hornorujunik arlalinnik saassutarineqartuarpoq. Ullumili qaartartumeerisarsimasut 1.000-it sinnillit akornini tigusarineqarsimasut 70-it missingi eqqartuussisunut sassartinneqarput. Eqqartuunneqalersut kitaamiut immikkut najugaqarfigisaannik, Saudi Arabiallu uuliaqarfianik pingaarnerpaamik qaartartumeerisimasutut eqqartuunneqartussanngorput.

Inuit 200-t, sakkutuullu paarsisuutitaasut 70-it missingi toqussimavaat. Qangali pasitsaanneqarpoq Al-Qaeda isumaqataallu uppeqqissaarniat qaartartumeerisuusarsimanissaat. Aatsaat ukiut tallimat qaangiuttut immikkut sungiusakkanik sakkutuunik 35.000-inik akiorneqalermata tigusariortorneqalerput. Qaartartumeerisartut kitaamiunut akerliuinnanngillat. Saudi Arabiamili kunngikkormiut aningaasaatilissuit pissaanerminnik atornerluisut akiorniarsimavaat. Eqqartuussinerup aallartinngitsiaani Saudi Arabiami naalakkersuisut, pingaartumik palasinut inuusuttullu angajoqqaavinut kaammattuuteqarput ajortumeerinianit sunnertinnaveersaaqqullugit.

Ajortumeeriniatut unnerluutigineqartut 70-it missingi muhammedanerit inatsisitoqarsui Sharia tunngavigalugit eqqartuunneqassapput, pisuutitaagunillu innuttaasut tamat takkuanni niaquerneqartussaallutik.