Saudi Arabia kunngitaarpoq

Saudiarabiap kunngia toqusoq Abdullah kingoraarneqarpoq Kong Salmanimik, taassumalu qatanngutigigaluami politikkia ingerlateqqinniarlugu neriorsuivoq. Ullumi siusinnerusukkut taama oqarpoq, kong Abdullah unnuaq 90-inik ukioqarluni puallulluni toqummat.
Saudi Arabia Assi © : Fadi El Benni/Flickr
Allattoq DR
januaarip 23-at 2015 17:51
Nutserisoq Erna Lynge

Kunngip toqunera nalunaarutigineqarmat inuit tusindilikkaat oqaluffissuup tusaamasap Mekkap eqqaanut katersuupput.

 

Naak Kong Abdullah nunami qanganisarsiortumi qanganisarsiortunik innuttalimmi siuttuusimagaluartoq, ilisimaneqarpoq aaqqissuusseqqinniarluni misiliigaluarpoq.

 

Assersuutigalugu arnat inuiaqatigiinni peqataanerunissaat illersugaraa, USA-millu qanittuaqqamik suleqateqarluni. Akerlianit tamat oqartussaanissaata atuutsinneqalernissaa sulissutiginngilaa, "arabiamiullu upernaavannik" taaneqartartoq minnerpaamilluunniit Saudiarabiami siammartinneqanngilaq.

 

Ingerlatsisimaneratut ingerlaqqiinnassaaq

Nunap taassuma kunngitaava oqalugiarami oqarpoq, kunngiusimasup ingerlatsisimaneratut nuna ingerlaqqiinnassasoq.

 

Kong Abdullaangaluup kingoraartaa 79-inik ukiulik Kong Salman oqarpoq qatanngutigigaluami politikkia ingerlateqqinniarlugu. Politikki taanna Saudiarabia tunngavilernerqarmalli ingerlanneqarsimasoq, taanna oqarpoq.

 

Ilanngullugulu oqarluni assigiimmik pisussaaffeqarneq suleqatigiinnerlu nunat arabiamiut akunnerminni ingerlattariaqaraat.