Sattallutik aningaasalersuilerput
Avannaata kommunerujussuassaani 2009-mut missigersuutit sattalluni suliarineqassasut, taavani Ikaarsaariarnermi ataatsimiititaliami ilaasortaq Inuit Ataqatigiinneersoq oqarpoq. Isak Hammond, IA-meersoq oqarpoq illoqarfinnut kattuteqatissaminnut ataatsimiititalimi ilaasortat ataasiakkaarlutik pissutsinik piviusunik paasiniaanissaminnut periarfissinneqarsimanngitsut. – Sattalluta missigersuusiussaagut taamaattumik kukkuluttornissarput qanittuararsuuvoq, Isak Hammond oqarpoq. Isak Hammond oqarpoq Ikaarsaarinermut Ataatsimiititaliami piffissaqartitaanatik pipallappallaamik sulisitaanertik kipiluttunartoq. – Innuttaasut pisariaqartitaannut naapertuuttunik ajoraluartumik aningaasalersuisinnaasussaanngilagut, illoqarfinni kattuteqatissatsinni pissutsit nalugatsigit, Isak Hammond oqarpoq.
Avannaani ikaarsaariarnermut ataatsimiititaliap Avannaani kommunerujussuanngortussap 2009-mut missigersuutai augusti aallartippat Qasigiannguani siullermeerlugit ataatsimiissutigineqassapput.
Avannaani Ikaarsaariarnermut Ataatsimiititaliap siulittaasua Jess Svane, Siumut, oqarpoq sattattoqanngitsoq 2009-mullu missigersuusiornermi 2007-mi 2008-milu kommunini arfineq-pingasuni kattuttussani isertitat aningaasartuutillu tunngavigineqartut. – Isak Hammonditulli ugguarpunga qinikkatut illoqarfinnut kattuteqatissatsinnut angallavigisinnaasimannginnatsigit pilersaarutigaarali aappaagumiit ornigutikulanerulernissara, Jess Svane oqarpoq.
