Satspulje pillugu isumaqatigiissuteqartoqarnera iluarisimaarneqarpoq
Kalaallit Danmarkimi atugarliortut kalaallillu nooqqammersut inuiaqatigiinnut pitsaanerusumik akulerutsinniarneqarnissaat Siumup tungaanit annertuumik isiginiarneqarsimapput. Tamanna pitsaasumik sunniuteqarsimavoq, satspuljemiimmi aningaasanik agguaassisoqarnerani siunertamut tassunga 13,4 mio. kr.-it immikkoortinneqarsimapput. Tamannalu Doris Jakobsenip, Siumut sinnerlugu Folketingimut ilaasortaasup, nuannaarutigaa.
- Danskit naalakkersuisuisa qanittumik suleqatiginerisa iluaqutaanera paasillugu nuannerpoq. Aningaasaliissutit ikikkaluartut kalaallinut atugarliortunut suliniutinut 13,4 mio.-t pissarsiarineqarsimapput. Peqatigitillugu Danmarkimi inunnik isumaginninnikkut attaveqaqatigiinnermi taamatut suliaqarneq annertusarniarneqarpoq, tamannarpiarlumi aningaasanut inatsisissaq pillugu oqallinnermi siunnersuutigaara, Doris Jakobsen tusagassiorfinnut nalunaaruteqarnermini naqissusiivoq.
Kalaallit Danmarkimi najugaqartut isumaginninnikkut sullinneqarnerisa ilarujussua kalaallit illuinit Danmarkimiittunit sisamaasunit ingerlanneqartarpoq. Satspuljemit aningaasaliissutigineqartut atorlugit kalaallit illuisa sulinerat pitsaalluinnartoq ingerlateqqinneqarsinnaanngorpoq.
- Susassaqarfimmi suliatigut ilisimasat attaveqatigiinnerillu annertusarneqarsimasut nukittorsarneqarnissaat qujanartumik ingerlateqqinniarneqarput, tamakkulumi kalaallit illui aqqutigalugit ingerlanneqartarsimapput. Taamatut kissaateqarlunga aamma saqqummiussaqarnikuuvunga, taamaammat taamatut isumaqatigiissuteqartoqarsimanera iluarisimaarluarpara, Doris Jakobsen oqaluttuarpoq.