Satelitsi MetOp aallaannaqaaq!

Europamiut silasiutissatut satelitsiliaat MetOp kiisami ippassaq aallaannaqaaq.

Pingajussaaninngooq ilumoortarpoq taama oqariartaaseqartoqartarpoq. Satelitsi taanna sapaatip-akunneri siuliini iluatsinngitsumik aallarteriarneqaraluarpoq taamatuttaaq aasaq julimi aallarteriarneqaraluarluni. Aallanngitsoortarneranut silap ajornera teknikkikkullu ajutoornerit peqqutaasarsimapput.

Uagullu nunatsinniit satelitsi taanna aamma iluaqutigissavarput. Silassamik paasissutissiinerit eqqornerusut takuneqarsinnaalissapput, pingaartumik nunani avannarpasinnerusumiittuni, soorluttaaq nunatsinni.

Satelitsi ippassaq unnulersoq arfineq-marlup qeqqaliivinnerani Ruslandimi Kasakhstanimiit aallarpoq. Silasiortorpassuit soqutinnittorpassuillu qarasaasiaq aqqutigalugu malinnaasinnaasimapput. Taamatuttaaq Tysklandimi illoqarfimmi Darmstadtimi avataarsualerinermik suliallit inuit 200-t malinnaaqqissaarsimapput satelitsilu aallarniariarmat nuannallutik nillerrassimaqalutik.

Satelitsi silasiutissaq 6 meterisut portutigivoq 4 tonsinillu oqimaassuseqarluni,

Satelitsillugooq taassuma nunarsuaq 100 minutsip ingerlanerinnaani kaajallattartussaavaa.

Satelitsip inuit europami najugallit silassap qanoq inneranik erseqqinnerusumik tuniorartartussaavai.