"Sassuma arnaa" ullumi uleerneqassaaq

Allattoq Najaaraq Egede
septembarip 25-at 2007 05:34

Nuummi ussanneqartalersussamik ullumi ulloqeqqata qeqqa uleersisoqassaaq.

Ujarak qiperugaq ”Sassuma arnaa” to meterisut portutigisoq Nuutoqqami Napparsimavitoqqap saavani uleerneqassaaq.

Qiperugarsuup allanit allaaqutigissavaa ulinnerup angusartagaanut inissinneqassagami, taamaalilluni Sassuma arnaanik qiperugaq tamarmi tinikkaangat aatsaat takuneqarsinnaasassaaq.

Qiperukkamik Nuup Saavaniittuliinissaq, komunalbestyrelsemi ilaasortaasimasumit Vittus Holm-imiugaluamit 1999-imi siunnersuutigineqaqqaarpoq.

Piviusunngorsinnaalerporli borgmesteri Agnethe Davidsen Tysklandimiitilluni qiperugaq immap killerpiaani inissitaq takugamiuk.

Granitti Sverigemeersoq atorlugu ”Sassuma Arnaa”-nik qiperuisuuvoq eqqumiitsuliortoq Christian ”Nuunu” Rosing.

Aallarteqqaarmat ujarak 8,5 tonsiusimavoq, naammassinerminilu syv tonsiinnanngorsimavoq.